NSA chief Ajit Doval-an Moscow pan ang

National Security Advisor Ajit Doval chuan Moscow pan dawnin Russia-Ukraine indona tihtawp a nih theih nana sawihona neih turah a tel dawn tia sawi a ni. Tun hnai lawkah Prime Minister Narendra Modi chuan Russia leh Ukraine tlawhin leader pahnih Vladimir Putin leh Volodymyr Zelensky te a hmu ve ve tawh bawk.
Ukraine a tlawh hnu lawkah leh President Zelensky nena an inhmuh hnu lawkah Prime Minister Modi chuan phone-in August 27 khan President Putin a be bawk a. Russian embassy chuan thuchhuah a siam zuiah Prime Minister Modi chuan President Putin chu Kiev a tlawh chungchang leh India in Ukraine buaina chu political leh diplomatic hmanga chinfel a duh thu a hrilh tiin an sawi zui bawk.
Modi leh Putin inbiakna neihah hruaitu pahnihte chuan peace talks a awm theih nan NSA chief Doval chuan Moscow pan se an tih avangin tun Ajit Noval chuan Moscow a panna chhan a ni tih a ni bawk.
“Vladimir Putin chuan Kiev authority leh Western partners te destructive policy chungchang sawiin Russia-in buaina chinfel a nih theih nana a hmalakna te PM Modi hnenah a hrilh a ni,” tiin Russian Embassy thuchhuak chuan a tarlang bawk.
Prime Minister’s Office chuan hruaitu pahnih te’n Russia-Ukraine buaina chungchang sawi dunna an nei a ti bawk a. “PM Modi chuan tun hnaia Ukraine a tlawh chungchang a sawi a. Buaina chinfel a nih theih nana dilaogue leh diplomacy pawimawhna te leh chumi kawng chauha remna tluantling neih a nih theih dan tur a sawi a ni,” tiin PMO thuchhuah chuan a tarlang bawk.
Prime Minister Narendra Modi chuan Ukraine buaina chu a rang thei ang bera chinfel ni se a duh takzet a ni tiin a official handle X a pawh a tarlang zui bawk.
Thla kalta khan Prime Minister chuan Ukraine tlawhin President Volodymyr Zelensky nena inhmuhna an nei a. He hunah hian Russia-Ukraine indona sawi dunin Prime Minister Modi chuan, “India a neutral ngai lo, remna lam chauh kan thlawp thin” tiin a sawi a ni.
President Putin chuan Ukraine buaina chungchangah Russia-in a biak pawh ram pathum zingah India a tel a ti a. “Kan thian leh thawhpui te kan zah a, he buaina leh a chhehvel chinfel tak tak duhtu chu China, Brazil leh India te an ni a. He issue ah hian an ngaihdan kan la reng a ni,” tiin Putin chuan a sawi.
World leader te pawhin India chu Ukraine buaina tihtawp a nih theihna turah pawimawhna thuk tak neiah an ngai a. Italian Prime Minister Georgia Meloni pawhin Ukraine President Zelensky nena an inhmuh hnuah, “Buaina chinfel a nih theih nan China leh India-te chu an pawimawh a ni. He buaina hi Ukraine phatsan chinfel tur erawh a ni hauh lo,” tiin a sawi.
Russia-Ukraine buaina chuan khawvel a thendarh a, global powers te chuan thlawp bik an nei tlangpui a.
Mahse, New Delhi chuan remna ngiatin Prime Minister Narendra Modi chuan ‘tun hi indo hun a ni lo’ tiin a sawi ve thung.