England an chak nghal

Manger thar Lee Carsley hnuaia an game hmasa berah England in hnehna an chang nghal. England hian Nations League, League B lama an khingpui Republic of Ireland chu Mimualah si hnih faiin an hneh. England tan hian Jack Grealish chuan goal khat a thun.
Euro 2024 final-ah Spain ngam lova an tlawm hnuin Gareth Southgate chuan England manager hna a bansan zui nghal. Southgate hmunruak luahtu atan Lee Carsley chu Three Lions chuan an manager lailawk atan an ruai. Manager thar Lee Carsley hnuaiah inrinni zan khan an match hmasa ber an khel a, Nations League-ah hnehna nen bul an tan. Manager thar Lee Carsley chuan Euro 2024 khel phak lo Jack Grealish chu ram tan khel turin a kokir a, Republic of Ireland lakah bul a tan nghe nghe. Manager tharin a chunga rinna a nghah hi Grealish hian goal hmangin a chhang let.
England tan hian midfielder pawimawh Declan Rice chuan minute 11-na lekah hmahruaina goal a thun nghal. Hma takah goal an thun vangin Three Lions in inrintawkna sang zawk an nei a, Mimualah tha zawkin an inlan. Three Lions tan hian Jack Grealish chuan minute 26-naah Declan Rice siamsak atangin an goal hnihna a thun. Minute 26 chhunga an goal hnih thun hi an chakpui a, England in point thum an hmu.
Season liam ta khan England hi Nations League-ah an chetha lo viau a, League A atangin League B-ah an tlahniam. League B-ah an khelh tak vangin khingpui nem zawk an nei thin dawn a, Group champion niin League A lamah let leh tumin tan an khawh ang a. England hi League B, Group 2-ah Greece, England, Republic of Ireland leh Finland te nen an awm tlang.