Selena Gomez a billionaire ta

Selena Gomez hausakna chuan dollar tluklehdingawn a pel ta niin Bloomberg Billionaire Index thar berah an tarlang. Zaithiam leh lemchanthiam, sumdawng ni bawk Selena Gomez hi a vawi khat nan he billionaire index-ah a lang a, a hausakna chu dollar tluklehdingawn 1.3 niin an tarlang.
Selena, kum 32, hi ro khawm vanga hausa ni lo, mahni kutkawih liau liaua billionaire ni thei a ni a, US hmeichhe zingah mahni kutkawih ngeia billionaire ni thei naupang ber te zing ami a ni a, rimawi leh lemchan khawvel atangin sum tam tak hai lut mah se a sum hmuhna lian ber a sumdawnna, cosmetics company, Rare Beauty Brands Inc. a ni.
Selena hausakna 81% vel zet chu Rare Beauty Brand atanga a thawhchhuah a ni a, he company hi 2020-a a din kha niin, sumdawnna thang duang tak a ni. Kumtir lamah khan a company hi a hralh dawn niin thulengvak a awm a, mahse, Selena chuan 2024 TIME100 Summit-ah hralh tumna a neih loh thu a sawi chiang ta a ni.
Rare Beauty atanga a sum hmuh bakah a hausakna 7% dang chu professional endorsement atanga a hmuh niin, 5% chu touring atanga a hlawh a ni a, a tour hnuhnun ber chu 2016 kha a ni daih tawh bawk. A hausakna 2.5% chu 2022-a a din mental-health startup Wondermind atanga a thawh chhuah niin, a dang zawng chu acting bakah album hralhna leh streaming sales bakah real estate investment atanga a thawh chhuah te an ni.