Plum rit ber an thar

Theite lian chi kan ti mai thin a, Plum an ti a, South Africa-a thlai chingtu Dean leh Deon Barnard te chuan plum lian zet mai an thar a, kg chanve dawna rit niin, Guinness World Record-in khawvela plum pum khat rit berah a puang. Dean leh Deon te plum thar i gram 464.15 a rit a ni. A hmaa hetiang record chu 2021-a Japan-a an thar a ni a, record hmasa aiin Dean leh Deon te plum thar hi gram 109.78-in a rit zawk.
Dean leh Deon te hian an fram Oppie Plaas Boerdery-a an plum hmuna an chin a ni a, an thei huan hi hectare sarih (acre 17.3) a zau a ni. Dean chuan, “Record siam tuma a chi tihdanglam pawh a ni lo. Plum kung pangngaia rah ve tho a ni. A pum a len theih nan engtia han enkawl bikna pawh kan nei chuang lo,” a ti.
He plum hi an lawh hlimah chuan gram 480 a rit a ni a, mahse, a moisture te a hloh deuh a, Guinness World Record official te nena an buk lai chuan gram 464.15 a rit a ni ta a ni. An plum chin hi Autumn Treat an tih ang chi a ni a, Dean chuan a thlum tui hle niin a sawi.
Dean leh Deon te hian plum hi kum riat chhung an lo buaipui tawh a, tunhmain hetianga plum lian fal bik hi an la thar ngai lo a, kumin hian gram 400 leh gram 450 a rit te pawh an thar tel a ni.