Lunglei Bawrhsapin MBKHP Chhawmdawlna In a tlawh

Ruihhlo ngaite leh hmeichhe rahbi tleute enkawlna leh chhawmdawlna hmun, Baptist Church of Mizoram (BCM) hnuaia Mizoram Baptist Kohhran Hmeichhe Pawl (MBKHP) enkawl Chhawmdawlna In, Melte chu nimin khan Lunglei District Bawrhsap Pu R. Lalthazuala chuan tlawhin, an hma lakna a enpui.
Lunglei Bawrhsap R. Lalthazuala hi Additional Deputy Commissioner James Miahlung leh District Information & Public Relations Officer C. Lalhruaitluanga te’n tawiawmin, Chhawmdawlna Ina thawktute’n an lo dawngsawng a. Chhawmdawlna In hmunhma leh building hrang hrangte lo fanpui, an hma lakna leh hmachhawp an neihte an lo hrilhfiah a ni.
Bawrhsap chuan ruihhlo ngaite enkawlna leh chhanchhuahna kawnga Chhawmdawlna In hma lakna chu fakawm a tih thu sawiin, an taksa mamawh ngaihtuahsak leh Pathian thua enkawlna piah lamah, rilru leh taksa hrisel nei tur leh chhawr tlak thiam thil nei tura zirtirna leh kaihhruaina an pe chu lawmawm a tih thu a sawi a. Ruihhlo dona leh ram siamna kawnga sawrkar hma lakna tichaktu leh chhawk zangkhaitu pawimawh tak an ni tih sawiin, an rawngbawlna chu tha taka chhunzawm zel turin duhsakna a hlan a. Chhawmdawlna In tan hian tanpuina thilpek a hlan nghal bawk.
MBKHP Chhawmdawlna In hi kum 1997-a din kha niin, tunah hian Project Manager hovin thawktu mi 25 an awm a. Chhawmdawlna Ina enkawl lai hi mi 87 (mipa 68 leh hmeichhia 19) awmin, an dinhmun azirin hunbi fel tak siama enkawl an ni thin a. An taksaa harsatna an hneh theih nana enkawl bikna leh anmahni kawmna leh thu tha fahna (counselling) te kalpui a nih bakah, mahni kutkawiha ding thei tura thiam thil chi hrang hrang zirtirna te kalpui a ni a. Hmeichhe tan puan thui leh la phiar zirna kalpui niin, mipa tan thing mistiri (carpentry) leh khawl thil siam (electronic wiring & repair) zirna te kalpui a ni bawk.