Billboard 200-ah Sabrina Carpenter ‘Short n’ Sweet’ a la No.1

Billboard 200-ah Sabrina Carpenter ‘Short n’ Sweet’ a la No.1
Sabrina Carpenter album ‘Short n’ Sweet’ chu Billboard 200 (albums) chart-ah a No.1 a, he chart-a kar thum a No.1-na a ni ta a, kumina album tlangzarh zingah he chart-a lan theih atanga a zawna kar thum chin No.1 thei pahnihna a ni a, hetiang ti thei album dang chu Taylor Swift ‘The Tortured Poets Department’ kha niin, he album pawh hi an tlangzarh atanga kar thum chhung a zawnin a No.1 thei a, chart-ah hian a zawn ni lovin kar 15 a No.1 zui nghe nghe a ni. Hetihrual hian Pink Floyd frontman thin David Gilmour album thar ‘Luck & Strange’ pawh top 10-ah a lang.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Sabrina Carpenter ‘Short n’ Sweet’ hi kar khat chhungin US-ah 1,17,000 an hralh leh a, chung zinga 1,01,000 chu streaming atanga album tlukpui (on-demand official stream maktaduai 134.79) niin, album tak tak hralh chu 15,000 a ni a, album-a hla mal hralhna atangin 1,000 a tling thei bawk.
Chart No.2 atanga No.6 thleng pawhin kar hmasa nen ranking a danglam lova, chart No.1 hlui Post Malone ‘F-1 Trillion’ chu 72,000 hralh lehin No.2-ah bawk a la awm a, Chappell Roan ‘The Rise and Fall of a Mid West Princess’ chu 57,000 hralh lehin No.3 a ni a, chart No.1 hlui Morgan Wallen ‘One Thing at a Time’ chu 52,000 hralh lehin No.4 a ni a, chart No.1 hlui Taylor Swift ‘Te Tortured Poets Department’ chu 51,000 hralh lehin No.5 a ni a, Billie Eilish ‘Hit Me Hard and Soft’ chu 47,000 hralh lehin No.6 a la ni bawk.
Zach Bryan ‘The Great American Bar Scene’ chu 38,000 hralh lehin No.8 atangin No.7 a kai thar leh a, Noah Kahan ‘Stick Season’ chu 38,000 tling lo deuh hralh lehin No.9 atangin No.8-ah a insawn a, chart No.1 hlui Morgan Wallen ‘Dangerous: The Double Album’ chu 32,000 hralh lehin No.11 atangin No.9 a kai thar leh ta bawk.
Pink Floyd frontman thin David Gilmour album thar, a solo album chart top 10 kai thei pathumna ni bawk ‘Luck and Strange’ chu 30,000 hralhin No.10-ah a debut. He album hi tun kum 9 chhunga David Gilmour album thar tlangzarh leh hmasak ber a ni a, 2015 khan a album ‘Rattle That Lock’ chu No.5 kaiin, 2006-ah ‘On a Island’ chu No.6 a kaipui tawh bawk.
David Gilmour hian Pink Floyd angin he chart top 10-a lang pha album 10 a nei tawh bawk a (1973-a No.1 ‘The Dark Side of the Moon’ atanga 2014-a ‘The Endless River’ thlengin) chart top 10 an kai vek a, chu chu Gilmour-a’n 1967-a band a zawm hnu vek a ni. The Dark Side of the Moon album phei hi chuan record siamin, Billboard 200 chart a lang rei ber a ni a, kar 990 chart-ah a lang thei a, kum May thla pawh khan chart-ah a lang leh nghe nghe a ni.