Mizoram Legislative Forum on HIV/AIDS thukhawm ART damdawi la mekte Aadhar nena thlunzawm rel

Mizoram Legislative Forum on HIV/AIDS thutkhawm hmasa ber chu nimin khan health and family welfare minister Lalrinpuii kaihhruainain SAD Conference Hall, MINECO-ah neih a ni.
Meeting-ah hian HIV positive, ART damdawi la mek zinga chhunzawm lo, anmahni awmna chhui zui hleih theih loh an awm thin chu pawi an tih thu tarlan niin, an Aadhar nena thlunzawm dan ngaihtuah nise tih a ni a. National AIDS Control Organisation (NACO) rawn chungin mi zawng zawng tan HIV test theihna tur MSACS hotute’n kawng lo dap se tih a ni bawk. He natna hi ram leh hnam hnuk khawih thil a nih avangin he natna veite hmusit leh endawng lova, nu naupai laiin HIV test an tih ngei ngei a ngai ang hian, Mandatory Test tih theih dan Policy duan emaw siam that emaw nise tih a ni bawk.
Health minister Lalrinpuii chuan, tunhma chuan he natna hi mi awm tha duh lo leh ruihhlo ngaite chauh kai theih tura kan ngaih laiin tunah chuan kan rin loh pui pui te’n an kai tawh a, kan fimkhur tlan a pawimawh takzet tih a sawi a. Member kalkhawmte, a bik takin Legislators MLA-te chu an bial theuha an thusawina-ah uar taka sawi thin turin a chah a ni.
Mizoram Legislative Forum on HIV/AIDS Member Secretary hi Project Director, MSACS a ni a. Member-ah hian MLA 25 an awm mek bawk. He hunah hian MLA Constituency tina HIV darh zel lohna tura MLA te nena thawhhona tur kawng hrang hrang te sawiho nghal a nih bakah Dr. Lalthlengliani, Project Director, MSACS chuan a lem nena entirin HIV/AIDS a kan ram dinhmun sawifiahna a nei bawk a ni.

HIV/AIDS leh Mizoram

1HIV Estimation 2023-in a tarlan danin, Mizoram Adult HIV Prevalence 2.73% a nih laiin National Adult HIV Prevalence chu 0.2% a ni.
1Kum 1990 a\anga August 2024 thleng khan Mizoram-ah HIV kai mi 31,461 hmuhchhuah tawh niin heng zinga mi 2,541 te chu nu naupaite a\anga hmuhchhuah an ni.
1HIV inkaichhawn tamna ber chu invenna tel lova sex hman niin HIV kai hmuhchhuah zawng zawng a\anga 63.93% an tling.
1Inchiu-na hmanrua inhman \awm a\anga HIV kai 30.80% an ni.
1Tun dinhmunah HIV kai enkawlna (ART) la mek mi 16,661 an awm.
1HIV kai boral mi 5,277 an tawh
1Tun dinhmunah a thlawna HIV test-na hmun (ICTC) 39 a awm mek.
1HIV kaite enkawlna hmun (ART Centre) hmun 14-ah a awm.
1ICTC leh ART Centre-te district zawng zawngah dah vek a ni.