Real palian ni ve turin engtia rei nge Mbappe hi nghah ngai dawn?

Real palian ni ve turin engtia rei nge
Mbappe hi nghah ngai dawn?
Paris St-Germain atanga free transfer-a Real Madrid a zawm hnuah Kylian Mbappe chuan zanin hian a club thar tana a vawikhatna atan Champions League match a khel dawn a, Bundesliga club Stuttgart an mikhual hunah hian a tir atanga lutin a khelh leh ngei rin a ni.
World Cup-a France champion-pui tawhtu Mbappe hian an ram top flight title chu a duh zat zat hui thei dinhmunah dingin PSG-ah khan a hoin tualchhung inelna an thunun thin a, mahse, Europe club inelna sang berah Paris club kha superstar rualkhat nen pawh an champion thei tlat lo a, chu chu Spain a pan chhan pawh niin a lang.
Kum 2029 thleng cham turin tun nipui thawt lai khan Bernabeu club a pan a, he kum nga chhung hian season tinah pound maktaduai 12.8 zel a hlawh dawn bakah kum nga chhunga pektlak turin Spanish giants-a contract a ziah man bonus pound maktaduai 128 tehreng a hui tel dawn a; chu mai a la ni lo a, club lam sumdawnna kalpuitute’n a thlalak an hralhna man atangin percentage chan a la nei tel cheu dawn!
Real hian an ngam huaiin, duat pawh an inpeih hle tih an inrem danin a tarlang chiang hle a; an lei chhan ang ngeiin Spain leilung a thlen hnu hian a club thar tan goal li thunin top scorer a ni leh der tawh a; Champions League lamah erawh chuan bul tan tur chauh a la ni a, he planet-a football club lian ber an tih mai behchhan chung ngei mai hian khawvela footballer tha berah a chhuak thei dawn em tih hi football khawvel thlir mek a ni a, chu mi tur erawh chuan hun a la mamawh hlek mai thei.
European champion line-up zanina kan hmuh turah hian he hmuna lo tlangnel tawhsa star attacker rualkhat – Vinicius Junior, Rodrygo, Jude Bellingham leh Brazil player la naupang tak Endrick-te hmakhalh fai vek thei turin Mbappe hian eng theihna chiah nge a kawl kan thlir ang.
Khawvela football club ropui berte zinga mi Real Madrid-in hian world class footballer rual englai pawhin an awmkhawm a tih theih a, thawk khat lai phei kha chuan superstar rual an phu sup sup a, galacticos tih tawngkam pawh a lar hle nghe nghe kha a ni a; tuna Mbappe an sengluh leh tak hnu hian galacticos tih kha a ri leh tan hial a, chutih ruala mite sawi duh tak pakhat chu France captain inngaihthlawmna leh in la star lo hi a ni!
Tarlan tawh angin, Real Madrid chhungkua hian mikhual hraw pui pui a lo chhawn tawh thin a, thenkhat chu ngeng ngalhte pawh an nih ve a rinawm a, Mbappe Madrid lut hlim erawh a dan a dang daih tih BBC sport columnist Guillem Balague chuan a column-ah a ziak.
Spanish sport journalist sawi zel danin kum naupang te ni chunga World Cup final vawihnih ngawt khel tawh Mbappe hian khelmual chhung leh pawnah inngaihtlawmna nun a vawng reng a, nungchang mawi lo a lantir lai hmuh tur a vang rawng rawng a, pawimawh bera inngai, tihlawm harsa leh midangte hnuaichhiah nun ang kha amahah hian Real Madrid inpui nghaktute’n an hmu lo niin a sawi!
Pressure sang tak nena lut ni mah se Spain ramah a insiamrem thei nghal a, a trophy lian la dawn loh awmchhun zinga mi Champions League title a lakpui nghal dawn em tih hi mi hriat chak a ni ngei ang.
Rawlthar kum 18 mi lek a nih lai khan PSG manager Unai Emery hnuaia game zawng zawng khelh a duh thu leh a khelh duhna pawh number nine a nih thu club a lo hrilh tawh a; Luis Enrique khan number nine dinhmun a pe a; a club thar Real Madrid-ah pawh number nine position bawk an chhawmtir a, ball a chuh ve vak vak lo a, khelmualah a che tam lo a, a ball hmuh goal-a chantir chu a hna pui ber a ni leh mek.
Manager Carlo Ancelotti hian a forward thar hi a duh dan dana chet phalna (licence to move) a lo pe nghal hmiah a, mahse, veilam sira a va luh phei chuan he lai hmun atanga hlauhawm siamchhuak thin Vinicius nen an indipbuai thei dawn a, heti a nih chuan Brazilian zawk hi Mbappe anga number nine hmun a luah a ngai dawn a, mahse, heti chung pawh hian Ancelotti chuan French international chet dan tura phalna a pek tawhah harsatna engmah a nei lo!
La vanglai tak chungin midfielder tangkai Toni Kroos a chawl ringawt tawh a, German awm loh hnuah Real Madrid football hi a dak zaih ta rih lo tih a hmuh theih a, hei hian tlarhma lama tlante pawh a nghawng lo thei lo a; Vinicius a khel tha reng thei bik lo a, tah tak hian Mbappe an leifuhzia a lang nghal a, a club thar tana a game khelh hmasak vawiruk atangin goal li a thun tling der tawh – goal hnih chu penalty atangin a ni.
A tir lamah khan game thum chhung goal a han thun lo ve phawt a, mahse, a theihna hrechiangtu club leh manager lam atangin nawrna a tawk hman lo a, pressure petu awmchhun chu media thenkhat mai an ni.
Big game an tih chinah chuan Ancelotti hian tlarhma lamah Vinicius, Mbappe leh Rodrygo a chhawr thin dawn niin a ngaih theih a, mahse, Inrinnia sihnih faia mualneitu Real Sociedad an hneh tum kha chuan 4-4-2 formation a hmang a, Vinicius leh Mbappe hian an tihtur leh khelh dan turah thui tak thutlukna an siam thei dawn nite pawhin a lang!