Formation and Promotion of 10,000 FPO
Kum 2020, February ni 29 khan India sawrkar chuan loneitute dinhmun chawisanna tur central sector scheme pakhat, “Formation and Promotion of 10,000 FPO” chu a hawng a. Kum nga chhunga FPO (Farmer Producer Organizations) 10,000 din hman tura hmalakna a ni a, he scheme atan hian cheng vaibelchhe 6865 ruahman a ni a.
Tun thlenga information kan hmuh theih chinah, nikum November 30 thleng khan he scheme hnuaiah hian FPO 7,597 a ding tawh a, chu chu sawrkar laipuiin a tinzawn (target) atanga 75% a ni tawh a, 25% hmabak a la awm tihna a ni a, target thleng pha turin tanlak nasat a ngai hle niin a lang. He scheme hnuaia hmalakna lian ber chu, huan thlai neitute, awlsam leh man man zawka an thlai tharchhuahte an dehral theihna tur bakah, loneituten eizawnna ngelnghet an neih theihna tur leh, state tin te economy chawikan theihna tura ruahman a ni.
FPO 10,000 chungchangah hian nimin mai khan Lawngtlaiah chuan Addl DC hovin hmalak zel dan tur sawiho a ni a. Hemi chungchanga Mizoram hmalak dan tur chu Mizoram sawrkar ‘Handholding Policy (Bana Kaih) vawiina tlangzarh turah chipchiar zawka tarlan a nih tur thu he meeting-ah hian sawichhuah a ni.
10,000 FPO scheme-ah hian India ram pumah implementing agencies (IA) 9 awmin, Mizoram chuan NABARD leh SFAC te a thlang niin hriat a ni a, hriat theih chinah Mizoramah hian FPO 34 an awm tawh.
Sawrkar laipui chuan FPO tin hi kum thum atan financial assistance 100% funding, cheng nuai 18 a tumsak a. Hei bakah hian FPO te hian credit guarantee facility atan project loan cheng nuai zahnih thleng an la thei dawn bawk a ni.
He scheme hnuaiah hian “One District One Product” kalpui a ni a, hei hi Mizoram tan pawh thil remchang tak a ni awm e. Kan hriat angin tun dinhmunah pawh, lakhuihthei, tomato, sapthei, hmarcha etc. thar tamna bik district te a awm nual tawh a, a remchang dawn hle a ni.
‘Formation and Promotion of 10,000 FPO’ leh Mizoram sawrkar Handholding Policy inkungkaih dan hi vawiina he policy tlangzarh turah hian chipchiar zawka tarlan a ni dawn a, farmer tan ‘good news’ a ni ngei ang.