Saitualah Mission Shakti hawng

Mission Shakti leh District Level Implementing Committee Saitual chu bawrhsap Dr Lalngura Tlau chuan Thawhtanni khan a hawng.
Bawrhsap chuan hmeichhiate tan hmasawnna rahbi thar ni turin Mission Shakti leh District Level Implementing Committee (DIC) chu a hawng tih a sawi a. Tanpui ngaite tanpuitu leh Saitual district-a hmeichhiate chawikanna a nih ngei a beisei tih a sawi.
Mission Shakti hnuaiah hian sub scheme pahnih – Samarthya (hmeichhe chawikanna) leh Sambal (hmeichhe humhimna) a awm a. Samarthya nodal officer Lalrammawii Kawilam sawi danin, Samarthya hi Mission Shakti hnuaia hmeichhe tana scheme awm zawng zawng khaikhawmtu a ni a. Hmeichhiate hleihlenna laka humhimna leh kawng hrang hranga hma an sawnna leh chawikanna tura din a ni.
Sambal nodal officer Flora Laltanpuii chuan hmeichhiate humhimna chungchang sawiin, women helpline – phone no. 181 hmangin mi tam tak chhanchhuah an nih tawh bakah One Stop Centre- hmeichhe hleihlenna tuarte enkawlna hmun a sawifiah a, thlatin enkawl lai engemawzat an awm thin tih a sawi.