Zirtirtute tan chona

Nimina Serchhip Teachers’ Association General Assembly hmanpuitu chief minister Lalduhoma chuan, central subordinate staff leh banking exam hrang hranga Mizo thalaite an tling hlei thei lo hi kan zirtirtuten chonaa ngaiin, tling zo ngei tura buatsaihna lamah tan lo la turin ka sawm che u a ni, tiin zirtirtu kalkhawmte hmaah a sawi a. Heng exama tling tawhte hian kan zirna system te, kan syllabus te an dem ngai lo; tih tak takna nena beitu an tlem lutuk hi an mang tiangtu zawk a ni, tiin a sawi leh bawk a.
Mizoram atangin Central Civil Services hnuaia Group A (All India Services)-a inziak tling thei kan awm lohna hi kum sawm chuang zet a ni ta. Mizoram sawrkar pawhin hei hi a vei a, kan Mizo thalai lehkhathiam zinga talent nei tha zual thlang chhuakin, chung miten All India Services-a an inziah tlin ve theih nan ruahmanna siamin tunah hian nasa takin hma a la mek a.
Hetih lai hian, Central Civil Services hnuaia Group B, C leh D -ahte pawh hian inziak tling hi sawi tur an awm mang chuang hauh lo. Chu chu tuna chief minister-in zirtirtute tana chona a chhawpchhuah chhan pawh hi a ni awm e.
Zirtirtute pawimawhna te, ropuina te, zahawmna te hi Teachers’ Day-ah kan sawi chhuak thin a, zirlaite leh nu leh pa bakah sawrkar pawhin Zirtirtute Ni-ah chuan zirtirtute chawimawina lam urhsun takin kan nei thin.
Zirtirtute ropuina te, zahawmna te, pawimawhnate leh mawhphurhna an neih san dan te kan inhrilh chiam chiam lai hian, a lehlamah zirtirtute hian an hna pui ber, chhawrtlaka mihring chherchhuah (human resource development) lamah hian an Grade hi a sang tehchiam lo a ni ang tih chu zirlaiteah hian a lang a tih theih awm e. Zirtirtute tan hian zirna system emaw syllabus emaw hi a pawimawh ber lova, eng system leh eng syllabus pawh hi tha lo a awm tak tak lo; zirtirtute inpekna leh thahnemngaihnaah hian zirlaite hi an innghat thui hle a ni.
Chief minister-in chona a chhawpchhuah hi Serchhip Teachers’ Association member-te chauh ni lo, Mizorama zirtirtute zawng zawng hian chonaah ngai vek thei se, hmasawnna leh changkanna hi zirnaa innghat a ni kan tih lai hian, zirnaa mawhphurtu zirtirtute ber hi innghahna tlak an lo ni lo palh ang tih a hlauhawm a. Zirlaiten mahni inrintawkna sang tak an neih theihna tur khawpa thiamna pawchhuak thei turin zirtirtuten tan an lak sauh sauh a ngai a ni ta ber awm e.