Inkhawihrawn thu ah sawrkarin magisterial inquiry kalpui dawn

Kumin September 21 zana Durtlang Leitana mi khawihrawn chungchangah sawrkar chuan magisterial inquiry a kalpui dawn tih Home minister K Sapdanga chuan a sawi.
Indian Medical Association Mizoram State Branch hruaitute chuan Thawhtanni khan Home minister hi a office ah an hmu a. September 21 zana Durtlang Leitana an doctor puite chunga kutthlak chungchanga an lungawi lohna, a case kalphung fel tawk lo nia an hriat leh, sawrkarin magisterial inquiry ti ngei tura sawrkar an beisei thu an hrilh.
Home minister chuan sawrkarin he thil thleng hi a ngai thutak a, magisterial inquiry nei turin thutlukna an lo siam tawh tih IMA hruaitute hi a hrilh a. A rang thei ang bera he inquiry hi hma lak a nih tur thu a sawi. IMA lamin an ngaimawh point hrang hrang an thlen chu sawrkarin a tul angin a lo bawhzui tur thu a sawi bawk.
IMA hruaitute chuan sawrkarin magisterial inquiry ti tura hma a la chu lawmawm an tih thu Home minister an hrilh a. Chutih rualin sawrkar hmalakna chu an thlithlai reng dawn a, rorelna dik a thlen ngei theih nan theihtawp an chhuah zui dawn tih an sawi. Mipui nawlpui himna atan Home department chu theihtawp chhuah zel turin an ngen a ni.
Sawrkar thuchhuak bawhzui hian Aizawl district magistrate Er. Lalhriatpuia chuan he thil thleng chhuichianna “magisterial inquiry” a din a. Addl district magistrate Aizawl Mark Lalthanliana chu inquiry la turin a ruat nghal. 2024 September 30-a order chhuah a nih atanga ni sarih ralhmaa a chhuichianna report thehlut tura tih a ni.