Farmer society din danah ZPM mi an inluling nasa – Dr Lalmalsawma

ZPM sawrkarin thlai thlan bika minimum support price a pek tumnaa farmer society din tura a tihnaah party mi an inluling hle a, mipui nawlpui pawm loh zawngin an kal mek tih Congress party chuan an sawi.
MPCC treasurer Dr Lalmalsawma Nghaka chuan thlai pali – sawhthing, aieng, hmunphiah leh hmarchaa sawrkarin minimum support price a pek turah he programme tihlawhtling turin khawtinah farmer society an din mek a. Khaw tam takah farmer society an lo din tawhna awm mah se, chu’ngte chu hlamchhiahin ZPM Unit kaihhruaiin society an din zel tih a sawi.
Tunhnaiah pawh Mamit district Rajiv Nagar khuaa Broom Society pathum awm tawh sa chu pawm loin, inchhunfin turin Land Resource, Soil & Water Conservation director hmangin Society awmsa hi hriattir an ni a. Inchhunfin a ngaih chhan chu, society pathum an awm kha sawrkar hnuaia Agriculture Marketing Assurance Fund Management Board duhdan kalh a nih vang nia ziah niin, director hian Rajiv Nagar-I Broom Grower Society inthlang turin a hriattir a, inthlanpui tur pawh department mi pathum ruat an ni tih a sawi.
Henga an thlanchhuahte hi ZPM VC chuan a pawm thei loa, ZPM tana Mamit bial viltu, ZPM secretary H Zorempuia chuan department changtu Minister hmu in recomendation a la a, society member-te thlanchhuah ni lo chu Society hruaituah an ruat ta tih sawiin, he thil diklo hi Rajiv Nagar-a hmunphiah chingtu society-a tel te chuan an pawm thei loa, thuneitu sang zawka an zualkona chuan ngaihsak a hlawh lo tih MPCC hruaitu hian a sawi a ni.
“Mipui dinchhuahna tak tak ai chuan, an flagship programe hmang hian ZPM mi leh sa duhsak leh vulhlen a tumna a ni tih a chiang hle a. Mi pahnih khat duh dana kal mai mai a, sawrkar official-te ruahmanna siam pawh zah zo lo khawpa Agriculture minister-in huaisenna a nei lo hian mipui nawlpui huap zo lo, party bil uchuak taka a duhsakna thil a ti mai hi a pawi hle a ni,” a ti.