YMA-in zan lam boruak vei
Thalai an meng rei a, tun hnaiah in chhung ni lo khawlaia meng rei an pung nge, zan lam boruak a nung viau a ni awm e.
Aizawlah chuan veng hrang hrangah kawn leh hmun laili deuh laiah zan lamah thalai an thu thup a, kawngpui a lun hle bawk. Chhuak ve lo tan pawh chak fe fea lirthei tlan thawm leh au lung lung thawm hriat tur a awm thin.
Tunlai zan lam boruakah hian tleirawl, kum lama la naupang zawkte an phusa viau nia sawi a ni a, hei hi YMA pawhin a vei a, branch hrang hrangah inzirtir tul an ti.
Central YMA-in September ni 5-ah khan hemi chungchangah hian thuchhuah a lo nei tawh a, ni 28 khan hmun hrang hranga YMA-te hnenah hemi chungchangah bawk hian hriattirna a chhuah leh.
“Zan lam boruak chungchangah hian September ni 5-ah khan thuchhuah kan siam tawh a, chumi hnuah chuan zan lamah thil duhawm lo a thleng zui zeuh zeuh a, branch tinin hemi chungchangah hian hmalak a tha kan ti a ni,” Central YMA general secretary Prof Malsawmliana chuan a ti.
“Naupang/tleirawl te’n tul leh pawimawh ni lova zan len an chin hi sual punlunna bul a nih avangin khawtlangah rah tha lo tak a chhuah thin a. |ul lova mi pawikhawihna leh insual rawnte kan ching ta zel hi a pawi tak zet a,” tiin hriattirnaah hian an ziak a, Sub-Hqrs, Group leh Branch YMA te hnenah hriattirna hi pek niin, mahni huam chhung theuhvah hemi lama hma lo la turin an ngen a ni.
A inzirtirna lamah te, tul lova zana chhuah a that loh thu inhrilh kawngah te, mahni remchan dan ang anga hma la turin an beisei. Central YMA hruaitute chuan khawpui leh thingtlang dinhmun a inang diak diak lo thei a, mahni mamawh dan ang zela bawhzui tur a nih thu an sawi.
Branch thenkhat chuan mahni veng YMA chanchinbu-ah hemi lam hawi hi an ziak tawh a, tleirawlte kokhawma zirtirte pawh an awm tawh tih thu dawn a ni.
Central YMA hruaitute sawi danin, hemi chungchang hi Kumpuan Sub Committee te rawtna atanga lo chhuak a ni a, Ram leh Hnam Humhalh kum bawhzuitute’n an thil tawnah tleirawl leh naupang zana teihawi an tam a, hei hi him lovah ngaiin an rawt a ni.