Lebanon PM in Israel vanga an tuar nasat thu sawi

Lebanon prime minister Najib Mikati chuan Israel in a beihna avangin nunau pawisawi lo tam takin an tawrh thu a sawi a, chenna in nei lo leh hmun him zawnga tlanchhia tam tak, hmuh hrehawm tak tak an awm thu a sawi.
PM chuan, heng mite hi engtinnge an nunkhawchhuah ang tih rilruah a lian ber lo thei lo a, kan tawrhna hi a na hle. Chenna nei lo tam tak tuamhlawm tur hmuh ringawt pawh hian rilru a na a, kan hun tawna hrehawm ber a ni awm e, a ti.
Lebanon health ministry sawi danin pathianni a Israel in Hezbollah ho a beihna avangin mi 50 chuangin nunna an chan a, nunna chan belh hi a la awm reng bawk a ni.
Pathianni a Israel in air strike hmanga Hezbollah ho a beihnaah hian an military commander Ali Karaki leh an hotu challang zinga mi Sheikh Nabil Qaouk pawhin nunna an chan a, hei hi Hezbollah lam pawhin a ni ngei tih an tichiang ve bawk.
Israel leh Hezbollah ho inbeihna hian reh lam a la pan thei lo hle mai a, nunna tam tak chan awm tawhin, in leh lo tam tak luahzui tlak loh khawpin a chhe tawh bawk. Israel chuan Hezbollah ho pui leh humah an thenawm Lebanon hi a la puh zel a, hei hi Lebanon chuan a pha thung.
Israel sipai hotu sang Herzi Haveli chuan Hezbollah ho chu an chimih zawh hma chu beih zel an tum thu a sawi thar veleh bawk.
He indona avang hian a khawi lam ram ve veah pawh pawisawi lo nunna tam tak lakin a awm tawh a, nunaute hmun him lamah a theih ang anga awmkhawmtir an ni a. Indona hian reh lam a pan maiin a rinawm loh a ni.