Box office-ah ‘Megalopolis’ chet chhiat laiin ‘Wild Robot’ a No.1
Film tlangzarh tar ‘The Wild Robot’-in fak a hlawh hle a Rotten Tomatoes critics score 98% leh audience score 98% a hmu pha a, opening weekend-ah Nort America-ah cinema hall ticket hralhna atangin dollar maktaduai 35 la lutin box office No.1 a ni. Hetihlai hian Francis Ford Cappola film siam thar ‘Megalopolis’ a che chhe hle a, dollar maktaduai 120 vel zet senga an film siam hian opening weekend-ah US-ah dollar maktaduai 4 chiah a la lut ve thung.
The Wild Robot hi Peter Brown lehkhabu ziah, lawng chesual avanga thliarkar pakhat a robot leh thil nung chi hrang hrang te an tan dan leh a, chuta robot pakhat ROZ an tih mai chu varak no, a puiin a thihsan pakhat nen an inngainat tak dan vel tarlanna a ni. He film hi Chris Sanders direct a ni a, ani hi How to Train Your Dragon leh The Croods te pawh hlawhtling taka lo direct tawh a ni. ‘The Wild Robot’-ah hian siamtu kutchhuak leh tecnology te inzawm dan vel tarlan a ni a, Lupita Nyong’o, Kit Connotr, Pedro Pascal, Catherine O’Haha te pawh aw thawhtu zingah an tel.
CGI-animated movie ‘The Wild Robot’ hian US pawnah, ram hrang hrang 29 atangin dollar maktaduai 18.1 a la lut bawk a, tihian khawvel huapin dollar maktaduai 51 a la lut tling nghal der taw a ni.
Kar kalta box office No.1 ‘Transformers One’-in dollar maktaduai 9.3 la lut lehin, No.1 atangin No.2-ah a tawlh a, he film hian kar hnih chhungin US-ah dollar maktaduai 39.2 a la lut tling ta a, ‘Beetlejuice Beetlejuice’-in dollar maktaduai 16 la lut lehin No.3 a la ni a, he film hian US-ah dollar maktaduai 258.1 la lut tling tawhin, US pawna a lak luh nen chuan dollar maktaduai 373.3 a tling tawh bawk.
Indian film, Telegu tawng hmanna action film ‘Devara: Part 1’-in dollar maktaduai 5.5 la lutin, box office No.4 a ni a, India film, Indian-in an direct zingah chuan North American box office-a thleng sang thei ber a la ni.
‘Speak No Evil’ chu top 5 khartu niin, dollar maktaduai 4.3 la lut lehin No.5 a la ni a, he film hian kar thum chhungin US-ah dollar maktaduai 28.1 a la lut tling ve ta bawk.
Capolla film siam ‘Megalopolis’ a che chhe hle a, dollar maktaduai 120 senga siam niin, opening weekend-ah maktaduai 4 chiah a la lut thei a, No.6 a ni. He film hi Adam Driver, Giancarlo Esposito, Nathalie Emmanuel, Aubrey Plaza leh Shia LaBeouf te channa a ni.
Box Office Top 10:
1 The Wild Robot $35,000,000
2 Beetlejuice Beetlejuice $16,040,000
3 Transformers One $9,300,000
4 Devara Part 1 $5,600,000
5 Speak No Evil $4,300,000
6 Megalopolis $4,000,000
7 Deadpool & Wolverine $2,657,000
8 My Old Ass $2,224,159
9 Never Let Go $2,200,000
10 The Substance $1,806,160