Sinlung Hills Council inthlanah ZPM leh HPC thawkdun dawn

Inthlang tura inbuatsaih mek Sinlung Hills Council inthlanah ZPM leh HPC party chu an thawkdun dawn a, bial 12 awmah ZPM hian bial 8 an chang ang.
ZPM president Lalliansawta sawi danin, 2023 MLA inthlanpui hma khan ZPM leh HPC chuan thawh dunna thuthlung an lo ziak tawh a, MLA inthlanah hian bial pathum – Serlui, Tuivawl leh Chalfilh ah an thawkho a ni.
He thawh dunna thuthlungah hian 2024 Sinlung Hills Council (SHC) inthlanah thawh dun zel nise, tia an lo dah chu bawhzuiin party pahnih hi an inbe zui a, duhdan inang lo leh beisei dan inang lote siamremin, thawk dun thei turin an lungrual ta tih a sawi.
SHC hnuaiah hian constituency 12 awmin, MLA constituency pathum a huam a. Kum 2019 khan mipui kutthlakna inthlan hmasa ber neih a lo ni tawh a, hemi tum hian MNF leh HPC tangdun chuan sawrkarna an lo siam tawh a. Tunah hian ZPM leh HPC chuan sawrkarna siam mekin, 2024 inthlanah sawrkarna siam ngei tumin thawh dunna thuthlung an ziak tih a sawi a ni.
SHC huamchhunga MLA bial pahnih – Serlui leh Tuivawl chu MNF MLA tlinna niin, ZPM a sawrkar hnu in ZPM-in nasa takin heng bialah hian hma an sawn niin Lalliansawta hian a sawi.
“Khaw hrang hrangah tunah chuan member-ah ZPM hi a tam ber kan ni ta zel a. MNF pawh tunhmaa ruhrel liana kan ngaih kha kan khum chho ta a. Congress phei chu khawtinah an chhuahsan chur chur a ni ber mai. Tun inthlanah pawh an ding a nih chuan pathumnaah hniam takin an awm zel dawnin a lang,” a ti.
Party pahnih thawh dunna chuan Hmar mipui beiseina a siamthar nasa niin ZPM hruaitu hian a sawi bawk. “Sawrkar lai kalphung thar kalpui mekte mipuiin kan lakah beiseina sang tak an nei a, chutih rualin HPC chu hnam movement kengtu, nunna tam tak chana lo beitu an lo ni bawk a, kan thawhhona hian hnam thinlung pu Hmar mipui nasa takin kan lama tang turin a chawk tho a ni,” a ti.

Party pahnih thawhdunna thuthlung siam angin:

8 Bial 12 awmah ZPM-in bial 8 an chang anga, HPC-in bial 4 an chang ang.
8 ZPM chan tur bial chu – Phuaibuang, Suangpuilawn, Vanbawng, Ratu, New Vervek, Sakawrdai North, Zohmun, Saipum.
8 HPC chan tur bial chu – Khawlian, Sakawrdai South, N. Tinghmun leh Saiphai.
8 Ministry ruangam chu ministry siam hunah party pahnih hian an la duang dawn a ni.
8 An sawrkar a nih chuan 2023-a an thawh dunna thuthlung siam chu an bawhzui zel anga, HPC Headquarters chu Sakawrdaiah an dah ang. Kum 1994-a Memorandum of Settlement leh Sinlung Hills Council Act 2018 tihlawhtling turin hma an la anga, SHC thuneihna (subject) mumal taka siamsak a ni ang.