Mizoten upate hlutna kan phawk zo lo – Lalthansanga

Mizoten upate hlutna kan phawk zo tawk lo hle a, upate hlutna chawikan zel a ngai tih minister Lalthansanga chuan a sawi.
October 1 kha Upate Ni a ni a, hmun hrang hrangah Mizoram Upa Pawl chuan hun an hmang. Zemabawk leh Zemabawk North ah pawh hman a ni a; Aizawl East-I bialtu MLA, minister Lalthansanga hian hmanpuiin, MUP Run Zemabawk Branch a hawng nghal.
Mizoten upate hlutna kan la phawk zo tawk lo hlea a lan thu sawiin, “Tun dinhmun kan thlen theih nana rim taka lo thawktute hi kan chawimawi thiam a pawimawh hle. Tawnhriat ngah tak tak, khawtlang leh ram inrelbawlna bakah nun hona kawngah pawh thil tam tak lo tawng tawh leh inzir fing tawh an nih avangin an hnen atang hian zir tur tam tak a awm a ni,” a ti.
Kan kum a lo tam avangin mi hman tlak lo leh tangkaina nei lo kan ni ngawt loa, thalai zawkte leh kan tu leh fate hnenah zirtir tur kan ngah em em tih minister hian a sawi a. Khawvel thiamna thilah kan sang lo a nih pawhin, inthlahrun nan hmang mai loin, engemaw chen chu a hman dan kan zir ve zel pawh a tha tih a sawi.
Sawrkarin upate hamthatna tur chak takin a bawhzui mek a, a hlawhtlinna hmuh thuai an beisei tih a sawi bawk.