Kan tih tur ni loah kawng kan siam Sum ruahman sa a danglam phah – Chief minister

State PWD mawhphurhna ni lo chinah kawng an thawmthat fo avangin an sum inruahman sa nasa takin a tih danglam phah tih chief minister Lalduhoma chuan a sawi. Inrinni khan Sairang leh Kawnpui inkar kawng, NHIDCL-in an siam mek chu chief minister hian a tlawh a. Sairang leh Dur lui inkar velah kawng chhia avangin lirthei a kal hleithei lo tih sawi a awm avanga a hmuna enfiah nghal an ni tih sawiin, “Hmun 4/5 velah a chhia a, siam har lutuk tur a ni lo. Hmanrua chhawpin an siam dawn mek a, October 9 hmaa siam ngai zawng zawng siam zo hman turin kan inhrilh a, peih hman an tum tih an sawi,” a ti.
Tuna kawng chhe zual lai bik chu NHIDCL enkawl a ni tih chief minister hian a sawi a. Mizoram PWD chuan helai kawng chhia bikah chuan tih tur a nei lem loa, a enkawltu NHIDCL hotute koin an enho tih a sawi. “An hnuaiah hian sum contract-a thawk Mizo contractor an awm a, chu’ngte mawhphurhna pawh chu a ni zawk mah. A tul chuan sub contractor lak belh a, an hna a tha lo a nih phei chuan, ban a, a dang lak leh mai turin kan inhrilh,” a ti.
Kawwngpui enkawlah state PWD khawih chin leh NHIDCL khawih chin a awm a, mipui tan pawh tu enkawl zawk nge tih hriat hran a har thin tih Lalduhoma hian a sawi a. Kawnpui to Khamrang pawh Mizoram sawrkar mawhphurhna a ni hran loa, Sad Guru enkawl niin, an enkawl hun chhung (defect liability period) agreement-ah an enkawlna tur sum hi cheng nuai 12 vel lek dah a ni a, an tan chet ngaihna a awm loa, an enkawl thei tawh lo tih a sawi.
Sad Guru defect liability period tawp hun, nakum atangin NHIDCL-in lachhawng tur an ni a. Sad Guru enkawl hun chhung tur hi a la tawp miau loh avangin NHIDCL-in an la duh bawk si loa, anni’n an enkawl thei tawh bawk si loa, an mawhphurhna a ni chiah lo mah se, mipui harsatna hrethiamin state suma siamthat mai relin an siamtha a, Sad Guru pawh bantir nghalin, an sim deposit cheng nuai 35 vel chu laksak an ni tih a sawi.
“Kawnpui leh Khamrang inkar hi chu sawisel tur vak a awm tawh loa, ngawrh takin PWD-in thawmtha mek,” a ti.
Mizoram sawrkar mawhphurhna ni lem lo, an tih tur pawh ni lem lo a ni chungin, Kawnpui leh Khamrang inkar chu state sumin an thawmtha tih sawiin, “Hei hian kan sum ruahman sa nasa takin a tidanglam a, kan sen lohna tur sen ngai kan ngah em em a, mipui hriatthiamna pawh kan ngen a ni,” a ti.
Mizoram Truck Driver Association chuan NH 306 – Dur lui leh Sairang inkar kawng chhia chu October 9 ral hma ngeia siamtha turin sawrkar an lo ngen tawh a, hmalakna a awm loh chuan tlan loh an tum tih an sawi a ni.