Familia Fanai Lal\ansanga
-- Advertisement --
Ka mi ngaihsan em em Ratan Tata fam dai rial a lo chan takah chuan amah ngaihhrui nan a chanchin tawi ka’n ziak ve hlek ang e.
Ratan Tata hi kum 1937 khan Bombay-ah a piang a, kum 10 mi a nihin a nu leh pa an inthen a, a pi, Navajbai Tata-in a enkawl seilen a ni a. Bombay sikul tha chhuak tih takah America rama a zirnaah pawh a kal tluang zel a, kum 1959 khan Cornell University, New York atangin architecture a zir chhuak a.
Kum 1962 khan India ramah a lo haw a, Tata Steel Jamshedpur plant-ah a thawk tan a, kum 1991 khan JRD Tata chuan Ratan Tata chu India ram puma Tata Group chairman atan a ruat a. A ruat chhan JRD Tata sawi chu, “A hriatrengna a tha a, min chhun a ni,” tih chiah a ni. A lo hmu chiang khawp mai.
A tawi zawngin sawi ta mai ila; Kum 21 chhung Ratan Tata-a’n Tata Group a enkawl chhungin Tata hmasawnna chu thopa zuan tak meuh meuhvin a zuang a. Tata chu India ram company lian mai ni tawh lovin khawvel pum huap company lian a lo ni ta a ni. Tata Group sum lakluh chu a let 47 (vbc nuai 4.75)-in a tipung a, a hlep hlang punna chu a let 51 (vbc 33,5000) a ni ta dawrh mai a ni.
Kum 2000 khan Khawvel pum huapa thingpuife siamtu company lian, Tetley chu US dollar million 407-in a lei a, kum 2007 khan kahpathir siam company lian Anglo-Dutch Corus Group chu US dollar billion 12-in a lei a. British multinational automobile manufacturer, Jaguar Land Rover chu kum 2008 khan US dollar billion 2.3-in a lei bawk a ni. A ngaihtuahna a fim bawk a, sum a ngah a, a che hraw khawp mai. Chuti chung chuan amah hi mi inngaitlawm tak a ni a. Nupui hi vawi li chu neih a tum ve na a, a puitlin zo ta ngang lo va, a bantlang ta a ni. A nupui nei lo hi a lehlam zawng tak chuan India ram tan malsawmna a nihna lai a awm. A ngaihtuahna zawng zawng hi India ram hmasawnna nan a hmang tangkai thei ta hlauh zawk a. Zar buaitu an awm lo.
Parsi Zoroastrian chhungkua atanga sei lian a ni a, “Pe rawh u, pekin in awm ang,” tih thu hi a vaki thu vawn ve mai mai lo a, thu chu tisaah chantirin Ratan Tata hian mi dang tan malsawmna ni turin sum hi a thawh hnem tiah tiah khawp mai. Zirna, hriselna, infiamna leh thingtlang hmasawnna lamah sum a sem chhuak hnem hle. A langsar zual chauh han tar lang ila; Kum 2008 khan a zir chhuahna (alma mater) Cornell University hnenah Tata Group chuan US dollar mtd 50 a hlan a. Kum 2010 khan Harvard Business School tan US dollar mtd 50 a pe a. Kum 2014 khan IIT Bombay tihchangtlun nan mtd 950 a thawh a, Covid-19 hripui len lai khan India sawrkar hnenah tanpuina sum fai vbc 1,500 a pe bawk.
Lirthei ngaina mi a ni a. A lirthei changkang kawlte chu; Mercedes-Benz SL 500 (nuai 42 man vel), Maserati Quattroporte with a twin-turbo V6 petrol engine (vbc 1 man vel), Land Rover Freelander (nuai 51 man vel), convertible model of the Jaguar F-Type S (vbc 1 man vel), Cadillac XLR (nuai 80 man vel), Chevrolet C4 Corvette (nuai 50 man vel), Tata Nexon (nuai 14 man vel), Chrysler Sebring (nuai 80 man vel), red, two-door convertible Ferrari California (vbc 3 man vel) te an ni hnawk hlawm.
Ratan Tata hi thlawhtheihna ngaina mi a ni bawk a, a thlawhtheihna Dassault Falcon private jet hi vbc 245 man vel a ni bawk awm e. Air India hi kum 1932-a JDR Tata bul lo tan a lo ni reng a. Ratan Tata pawh hian thlawhtheihna ngaingatna hi chu a thisenah a thanhnan a ni ve ngei ang. Lo ngaina tur chu a ni reng a ni.
Air India han sawi tâk azarah chuan TMB sawi kai ta law law ila. Ram buai hmaa piangho kha chu TBM hnung lama chuang tawh vek kan ni ang a, TMB chu Tata-Mercedes-Benz lamtawi a ni a. German company Daimler-Benz leh Tata thawhhona (Joint Venture) in kum 1954 atang khan India ramah TMB truck an siam tan a, kum 1969 khan Tata chuan amahin truck a lo siam ta a, kum 1977 atang khan S series (1210S) leh a hnuah SE (1210SE) an siam chhuak ta zel a, 1991 atangin Tata Sierra, 1997 atangin Tata Estate, 1994 atangin Tata Sumo, 1998 atangin Tata Safari leh Indica etc. The rest is history ti tawh mai ang.
India chhul chhuak mi ropui, mi fing, hmathlir nei tha, rethei leh pachhia te khawngaih thei, mi thil phal, mi inngaitlawm, India ram chawimawina sang- Padma Bhushan (2000), Padma Vibhushan (2008) leh khawvel ram hrang hrang chawimawina chi hrang hrang lo dawng tawh, Ratan Tata, a lai ah hming, Ratan Naval Tata, kum 86 mi chu Khuangchawi thla ni 9, 2024 khan Breach Candy Hospital, Mumbai-ah a boral a. India ram pum mite ngaihsan (National Idol) hi uitu leh suntu an tam nangiang mai.
Thih hnu pian lam ram hi chu chin hriat loh ram a ni miau si a, Fam khua atanga nungdama lo kir leh hringmi tu mah an la awm si lo va, a thlarau chu khawiah tak kal ang maw?