India mite zu in duh zat (dose) a sang tual tual

India chauh a ni lo, khawvel mihring hrim hrimin zu an in tam tial tial zel mai. Kum 2015 atanga India mi pakhatin zu a in chu nikumah chuan 38% zetin a lo tam tawh a, a dose a sang chak hle a. Kum 2010-a mi pakhatin litre 4.3 chauh in kha nikumah chuan litre 5.9 zet a in tawh a ni.
Ram 189 zeta chengten zu an in dan zirchiannaah kum khata kum 1990-a mi pakhatin litre 5.9 a in thin chu nikumah chuan litre 6.5-ah a kai tawh a. Kum tin 70% zetin zu in zat hi a pung a, kum 1990-a litre mtd 20,999 in ral chu nikumah chuan litre mtd 35,676 lai a tling tawh niin The Lancet-a zir chianna tihchhuahah tar lan a ni.
Kum 2030-ah chuan mi pakhatin zu hi kum khatah litre 7.6 a in tlin tawh mai rin a ni a. A bik takin ram thang mekah zu in zat pung tura beiseina a sang zual. Zu in ngai miah lo hi kum 1990-a 46% a nih laiin nikumah chuan puitling zingah 43% chauh an awm tawh a. Zu in hi 45% atangin 47%-ah a kai chho ta thung.
“Mihringin sum a lak luh tam hi zu a in tam chhan lian tak pakhat a ni thei a, hei bakah hian khamkhawp sang ta hrim hrim a nih theihna lai a awm bawk a. Kum 2030 thleng hian zu in zat hi a sang zel dawn niin a lang a, Europe ramah erawh zu in zat hi a pung vak dawn lo niin a lang,” tiin he zir chiannaa an hotu, Institute of Clinical Psychology and Psychotherapy, Dresden, Germany-a mi, Jakob Manthey chuan a sawi.
Tunah hian khawvel pumah mihring tld 2.3 vel hi zu in mi angin World Health Organization-in Global Status Report on Alcohol & Health a tihchhuahah tar lan a ni a. Zu hi natna thlen thei lian ber pakhat niin natna leh inhliamna chi hrang hrang 200 chuang nen inkaihhnawiha ngaih niin kum 2016 khan zu leh a kaihhnawih avanga thi hi mi mtd 3 vel an ni a, hei hi thi zawng zawng atanga 5.3% a tling a ni.
India bikah pawh zu in zat hi a pung zel a. Tunah chuan thihna a thlen theih dan hi cancer, kawngpuia chetsualna, inchhunga buaina, rilru hrisel lohna leh tualchhung buaina ang tluk zet a ni tawh.
Khawvel pumah zu leh a kaihhnawih avanga thi zingah thih hun tur pangngai aia hmaa thi hi chu 7.2% an tling phak a. Heng mite thih chhan tam ber hi zu ruih avanga inhliam (28.7%), pumpui tha lo (21.3%), thawkna buai (19%), zu avanga natna kai (12.9%) leh cancer (12.6%) te a ni.
Moldova ram chu kum khat chhunga puitling pakhatin zu in tam ber (litre 15) niin Kuwait chu in tlem ber (litre 0.005) an ni thung a. Zu in tam ram hi sum lak luh tlemna leh a vantlang an ni a, ram hausaah erawh a pung lem lo. Kum 2015 leh 2022 inkarah hian Vietnam-ah zu in zat hi 90% zet (litre 4.7 atang 8.9)-ah a kai a. Azerbeijan-ah erawh 82%-in a tlahniam thung.
Europe-ah zu in zat hi 12% (litre 11.2 atangin 9.8)-in a tlahniam a, hei hi Azerbaijan, Kyrgyzstan, Ukraine, Belarus leh Russia-ah te a hniam duai vang niin 22% (litre 15.8 atangin 12.3) vang a ni pakhat.