England chunga chuang Greece

Pathianni zan khan UEFA Nations League khelh chhunzawm a ni a, League B lama inkhelah Greece an chak a, England chungah an chuang chhunzawm zel. Greece laka an tlawm hnuin England chuan pathianni zan khan hnehna an chang ve bawk.
League B, Group 2 hmahruaitu Greece hian Georgios Karaiskakis Stadium-ah pathuamnaa awm mek Republic of Ireland an mikhual a, an mualah tha taka khelin si hnih faiin hnehna an chang. An mualah hnehna a chan leh tak vangin Greece hian Group 2-ah hma an hruai chhunzawm zel a, England chungah an chuang chhunzawm zel.
Greece leh Republic of Ireland te hi an inhnehtawk viau a, chawlhlawk hmain goal thun thei an awm lo. Chawlhlawk hmain goal thun thei bik lo mah se Greece chuan chawlhlawk hnu lamah goal an thun thuai a, goal hnih an thun ta nghe nghe. Greece tan hian captain Anastasios Bakasetas chuan second half tan atanga minute thumna lekah hmahruaina goal a thun ta nge nge. Second half tir teah goal an thun vangin Greece an phur a, inrintawkna sang zawk nen an inlan chhunzawm.
Manager Heimir Hallgrimsson hnuaia chak harsat Republic of Ireland hian an si phurh sut tumin tan khawh nasa hle mah se goal an thun thei lova, an tihsual vangin goal an chhuah belh leh ta zawk. Republic of Ireland si nghak Caoimhin Kelleher tihsual vangin Petros Mantalos chuan minute 90+1-ah an goal hnihna thunin an hmahruaina a tizau. Mantalos goal thun hnuin goal dang a luh belh tawh lova, Greece chuan an mualah hnehna a chang a, an group ah hma an hruai chhunzawm zel.
Season tharah Greece an chak tluan zel laiin Republic of Ireland erawh in chak an harsat viau thung. Manager Heimir Hallgrimsson hnuaiah vawi li khelin vawi khat chiah an chak a, tlawm zawkah vawi thum ngawt an tang. An group ah hian point thum hmuin pathumnaah an awm mek a ni. Vawi lo chak zawn tawh Greece hian thla tharah England leh Finland an hmachhawn zui leh dawn a. England hneh nawn leh ngei tumin tan an khawh ang.
England an chak
Football ram ropui, player lar leh hlawh hnem tak tak kawl khawmtu England hian inelna lianah chet that an harsat thin a. Nations League-ah League A atanga an tlakhniam hnuin Leagu B lamah lamah pawh beisei angin an khel tha lova, table-ah pahnihna an ni mek. Greece laka an tlawm hnuin England hian 3-1 in Finland an hneh a, point thum an hmu ve leh ta.
England hi Finland hmachhawn turin Helsinki Olympic Stadium-ah an lenglut a, an lenluhna mualah an khel tah viau. A khat mawi tawka goal thum an thun hnuin Three Lions hian hun tawp dawn hnaiah goal khat an chhuah. England tan hian manager lailawk Lee Carsley hnuaia hmun pawimawh chang thar leh Jack Crealish chuan inkhel tan tirh lam minute 18-naah hmahruaina goal a thun. Hma takah goal thunin, khel tha zui viau mah se Three Lions hian goal an thun belh thei lawk lo thung a, hun rei tak chhung 1-0 in hma an hruai.
Hun rei tak chhung goal lut a awm belh theih loh hnuin England defender Trent Alexander-Arnold chuan pui zetin free-kick a chhuih goal a, an goal hnihna a thun. Arnold hian goal a thun vangin hming thatna tam tak a hlawhchhuak a. Jack Grealish hnen atangin £500 a dawng tel keuh bawk. Manchester City forward Jack Grealish hian defender Arnold hnenah goal a thun chuan £500 pek a tiam a. Liverpool defender Arnold hian pui zeta free kick a chhuih goal tak si vangin Grealish hian £500 a chawi a ngai ta a ni.
Alexander Arnold goal thun hnu hian midfielder pawimawh Declan Rice chuan minute 84-naah England goal thumna a thun zui leh a, an hmahruaina a tizau. Goal thum ngawta an hnufual hnuin mualneitu Finland tan Arttu Hoskonen chuan minute 87-naah goal thunin an si phurh a sut then. Arttu Hoskonen goal thun hnu hian goal dang a luh belh thei tawh lova, England chuan 3-1 a hnehna changin, point thum an hmu ta a ni.
League B, Group 2-ah hian vawi li chak zawn tawh Greece in hma an hruai a. Point 9 hmuin England in pahnihna an luah a, pathumnaa awm Republic of Ireland in point thum an hmuh laiin table mawngphah Finland in point hmuh an la nei lo.