RTI lamtluang a titoh mek

On Oct 16, 2024 19 0

Motor kawng chhia a lar a, Right to Information (RTI) kawng pawh tunlaiin a \i\oh khawp mai. RTI hmanga zawhna chhanna hi engtianga rin tlak nge a nih tih thu pawh a hmangtute titi a tling.Miin RTI hmanga thil an zawh chhan pawimawh chu thudik hriat an duh vang a ni a, minister thil sawi a dik em tih hriat tuma zawt pawh an thahnem ang. Mahse tunlaiin minister-te’n RTI chhanna an endik thin tlat a, RTI Watch te’n CIC hnena an ‘complain’ pawhin awmzia a la nei lo.
Thu dawn danin, tunah hian chief minister-in RTI chhanna tura a chhangtute buatsaih pakhat pawh a kawl mek a, a zawttuin chhanna hi a dawn har phah dawn.
RTI hmanga zawhna hi ni 30 chhunga chhan tur a ni a, a chhang turin sorkar department-ah State Public Information Officer (SPIO) an awm thin. SPIO hian zawhna hi an lo dawng a, an chhang bawk a, mahse tun hnaiah SPIO-in a chhan fel vek hnua minister-in an en leh phawt a awm fo. Hei vang hian ni 30 chhunga chhan hman loh pawh a awm thin; chief minister-in a kawl mek pawh hi September ni 25-a chhan hman tur a ni a, vawiin thlengin an la chhang lo.
Kar hmasa khan chief minister-in SPIO chhanna hi a kawl tawh a, chief minister hnen atang hian pek chhuah a la ni lo tih thu dawn a ni.
Hetianga minister-in RTI chhanna an en hmasa thin hi a him lo tiin RTI Watch te’n September ni 9 khan State Chief Information Commissioner hnenah lungawi loh thu an lo thlen tawh.
Chief minister hian a hma pawhin RTI hmanga zawhna chhanna nena inang lo a lo puang tawh; RTI hmangin mi pakhatin CM relief fund hmanna a zawt a, chutah chuan CM relief fund dawngtu-ah MLA te, party unit te leh mak tih theih tur dangte an lang. Chutianga RTI hmanga thu dawn a nih hnu chuan chief minister hian facebook page-ah CM relief fund dawngtu list a post tha ve leh a, RTI chhanna nen a inang tawh lo!
RTI hmanga department pakhata thil zawttu pakhat chuan chhanna a dawn har thu a sawi a, hei hi minister-in a endik phawt vang a nih thu a sawi.
RTI hmanga thil zawttu dang pakhat chuan a chhanna lam theih a nih thu department lamin an hriattir a, la tura a kal chhungin minister-in a en phawt dawn tih an hrilh leh a, ni 30 chhungin chhanna a dawn hman loh phah tih a sawi.