Tunlaiin Mizoramin chakkhai a lakluhna kawngpui pawimawh a chhiat avangin bungraw phurtute’n harsatna an tawk a, ni tin mamawh thil a thleng tha thei lo.
Dawrkaite sawi danin, a hlawma lalutte’n an pek chhuah thin zat an lalut thei lo a, a thleng ang ang a zuar chhawngte hnenah an pe a, a hlawma petute chu an insem zo nghal duak zel. Amaherawhchu, a zuar chhawngte’n an hralh zawh nghal loh avangin lei tur a awm lo tihna a ni lo hlauh thin a, mipuiin lei tur an hmuh thin thilte hi a hlawma petute chuan tun hnaiah an ngah tak tak thei lo.
Kar hmasa tir lamah khan bawnghnute (amul gold) a thleng a, chumi hnuah Thawhlehni thleng khan a la thlen belh lo. Amul gold hi lei tur a awm lo tihna chu a ni lo a, thlen chu a thleng tlem.
Tel pawh tun hnaiah a hlawma laluttute’n (agency) an nei lo a, thleng leh thuai tura beisei chu a ni tih thu dawn a ni. Noodles pawh a thleng tha lo. Sangha pawh a hma angin a thleng tha lo; sangha lei tur awm tho mah se a chi hrang hrang a thleng tha lo.
Thil thenkhat chu a man a pung a, artui bawm khat, a hmaa Rs 1300 man kha tunlai hian Rs 1550 te a ni. Chini man pawh hmun thenkhatah chuan a pung nia hriat a ni.
Online hmanga thil chahna lamah kawng chhia hian harsatna a la thlen reng a, courier service thenkhat phei chu an chawl.
Ni tin mamawh thil thleng tha thei lo
Get real time updates directly on you device, subscribe now.