Shaboozey ‘A Bar Song (Tipsy)’ a la Hot ber

On Oct 16, 2024 17 0

Shaboozey ‘A Bar Song (Tipsy)’ a la Hot ber
Shaboozey hla hit ‘A Bar Song (Tipsy)’ chu Billboard Hot 100 (singles) chart-ah a No.1 a, he chart-a kar 14 a No.1-na a ni ta a, 2024 a he chart-a hla pakhat No.1 ni rei thei ber a la ni. He hla hi Shaboozey hla he chart-a No.1 kai thei hmasa ber niin, July thla khan No.1 a kai a, 2020 hnuah kar 16 No.1 thei Morgan Wallen hla ‘Last Night’ tih lohah chuan No.1 ni rei thei ber a la ni a, Shaboozey hi he chart-a vawi khat No.1 kaina a No.1 nih reiah pahnihna niin, Lil Nas X chiah a pha lo. Lil Nas X hi he chart-a a No.1 vawi khatna ‘Old Town Road’ (featuring Billy Ray Cyrus) kha kar 19 a No.1 thei.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni. ‘A Bar Song (Tipsy)’ hian kar khat chhungin stream maktaduai 26.4 leh sales 6,000 a la nei thei a, radio airplay pawh maktaduai 75.6 a la tling a, hei hi chart-ah a No.1 pui leh ta a ni.
Hot 100 chart history-ah ‘A Bar Song (Tipsy)’ hi kar 14 chin No.1 ni thei 14-na a ni a, chu chu he chart a hla No.1 ni tawh zawng zawng atanga 1.2% chauh a ni. Hetihrual hian he chart-a hla pakhat kar 14 chin No.1 pui thei hi midang zaipui lo, mahni chauha zaiah chuan Shaboozey hi a palina a ni.
‘A Bar Song (Tipsy)’ hi midang zaipui miah loa he chart-a Shaboozey lan vawi khatna a ni a, a hmain midang a zaipuina avangin tum hnih a lang tawh a, Beyonce a thawhpuina ‘Spaghettii’ chu No.31 a kai a, Beyonce a thawhpuina tho ‘Sweet * Honey * Buckiin’ chu No.61 a kai tawh bawk.
Billie Eilish ‘Birds of a Feather’ chu No.2-ah bawk a la awm a, he chart-a kar ruk No.1 ni thei, Post Malone ‘I Had Some Help’ featuring Morgan Wallen chu No.4 atangin No.3 a kai thar leh ta bawk.
Sabrina Carpenter-i’n chart top 10-ah hla pathum bawk nei lehin, kar sarih chhung chu a zawnin hetiang hi a ti thei ta. A hla ‘Espresso’ chu No.5 atangin No.4 a kai thar leh a, ‘Taste’ pawh No.9 atangin No.7-ah insawn lehin, a hla dang he chart-a No.1 pawh lo ni tawh ‘Please Please Please’ chu No.10 atangin No.9-ah a insawn leh hret bawk. Heng hla pathum te hi a No.1 album ‘Short n’ Sweet’ ami te vek niin, Sabrina hi he chart top 10-a hla pathum chin a zawn kar sarih nei thei parukna a ni.
Lady Gaga leh Bruno Mars ‘Die With a Smile’ chu No.6 atangin No.5 a kai thar leh a, Chappell Roan ‘Good Luck, Babe!’ chu No.7 atangin No.6-ah insawn lehin, chart No.1 hlui Teddy Swims ‘Loose Control’ chu No.8-ah bawk a la awm a, chart No.2 pawh lo ni tawh, Benson Boone ‘Beautiful Things’ chu No.12 atangin No.10 a kai thar ve leh ta bawk.