England boss nih chhuangtu Tuchel

England boss nih chhuangtu Tuchel
Chelsea boss a nih laia Champions League trophy hawn tawh Thomas Tuchel chu nakkum January ni 1 atanga England manager hna thawk tan turin nimin khan inremna ziahpui a ni a, he thu nemngheh a nih rual hian German coach chuan a hna thar avanga a inchhuan larh thu a sawichhuak.
Kum 51 mi chuan, “England team kaihruai tura hun remchang min pe hi ka tan chuan chawimawina a ni.
“He ramah hian hun rei fu chu football nen hian kan lo inzawm tawh a, hun chhinchhiahtlak tak tak pawh ka tawng nual tawh a. England team enkawl hna min kawltir hi ka tan chuan hamthatna lian tak a ni a, player talent nei tha leh spacial tak takte nena hna kan thawkho thei tur hi a phurawm takzet a ni,” a ti.
German coach hi Sven-Goran Eriksson leh Fabio Capello-te hnu lama British mi ni lo England men’s team manager nghet pathumna chiah niin, Euro 2024 final-a Spain an hneh loh hnu kumin July thlaa bang ta Gareth Southgate a thlak dawn a ni.
Head coach an zawn chhung atan August thla khan Lee Carsley chu interim manager atan lakluh niin, a ho hian game li an khel tawh a, thla thar Nations League match pahniha Greece leh Republic of Ireland an tum hunah pawh team a la hruai chhunzawm dawn a ni.
Carsley hoin October ni 10 khan Greece lakah England an tlawm a, ni thum hnuah Finland an hneh thung.
Tuchel hian season liamta tawp rual khan Bayern Munich chhuahsanin, a awl vang vang a, tunah hna tharin a hmuak ta a ni.
FA chief executive Mark Bullingham chuan Football Association-in khawvela coach tha berte zinga mi an rawih tak thu a puang a; FA thuchhuah chuan manager ni tura interview hmachhawn mi engemawzat zingah Tuchel an thlangchhuak tih an tarlang a, Tuchel-a contract ziah hun tak chu October ni 8 daih tawh kha a nih thu leh an puanzar lawk loh chhan chu international camp lama buaipui tur neuh neuh a awm vang niin an sawi.
Chelsea leh Bayern lama Tuchel nena lo thawkdun tawh English coach Anthony Barry kha England team-ah hian assistant tura lakluh ve nghal a ni.
Tuchel hian Bavarians a enkawl hma khan Mainz, Borussia Dortmund, Paris St-Germain leh Chelsea boss hna a lo chelhkual hrep tawh a; Dortmund a hrual lai khan German Cup lakpuiin, PSG kha Ligue 1 title pahnih a lakpui zingah 2019-20 season-a domestic treble champion a nihpui kha a tel.
January 2021-ah Chelsea manager ni tanin, September 2022-a ban a nih hma khan London club chuChampions League, Club World Cup leh Uefa Super Cup-ah a champion-pui hman.
Season liamta khan a ho hian Bayern Munich chuan kum 2011-12 hnu lama a vawikhatna atan Bundesliga title an hlawhchhuak zo lo a, a contract-ah kum khat la nei mah se a kalbo ta a ni.