Kût kan hman dan hi …

Chapchar Kut hi tourist-te hipna tura Kut phuahchawp ni lo mah se, tourist hipna tur liau liaua Kut phuahchawp Anthurium Festival te, |halfavang Kut leh Winter Festival te aiin tourist-te hmelhriat a hlawh zawk niin a lang. Hnam pakhat Kut Pui ber ni ta chu hnamdang khualzinte pawhin an lo hluta an lo hmelhriat thuk zawk a nih pawhin a mawh lo ve. Chutih laiin, Chapchar Kut hman dan zulzuia Kut phuahchawpte kalpui vek kan tum hi chu ngaihtuah chian a, her rem dan ngaihtuah a pawimawh hlein a rinawm. Chapchar Kut hi chu, tunhma pi leh puten Kut an lo hman dan hlimthla a taka entirna leh hnam ziarang pholanna hunah kan hmang a ni deuh ber tawh a. Phuahchawp Kut te hi chu phuahchawp a nih angin, tourist hip thei tur hawi zawnga phuahchawp taka hman dan ngaihtuah hi Kut awm chhan tak pawh a ni a, kan sukthlek hi her rem ve deuh loh chuan, kan target ber khualzinte hian ‘Kut dang nen a danglamna a awm tehchiam lo’ tiin an ngaihhlut loh phah thei awm e.
Tun tum Chapchar Kut-ah khan, ram chhung leh ram pawna Zofate kan fuankhawm leh a ni a; chutih rualin, G20 palaiten an hmang hman ve hlauh bawk a. G20 palaite hi ram hrang hrang atanga lo kalte an ni a, Chapchar Kut hian a hma aia khawvelin an hmelhriat zawk theihna chance a nei sang hle kan ti thei awm e. Tun lai khawvelah, kutphah atangin khawvel kan thlirin khawvel kan hmuhtir thei tawh a, kumin Chapchar Kut pawh hian zau zawkin hriat a hlawh phah ngei a rinawm.
Tuna hnam ziarang chi hrang hrang – ral lu lam, khuangchawi etc… kan entir thin ang hian, pi leh pu ten Chapchar Kut an lo hman dan hlimthla hi, Chapchar Kut kan hman apiang hian entir ziah theih ni ta se, thangthar zel tan pawh a hlawkthlak zual awm e.