K.Hmingthankaia
-- Advertisement --
Kawng: Kan ram kawng that rei theih loh chhan nia ka rin dan chuan- Kan ram hi Mizote awmna tura special taka Pathianin a lo ruatsa tlangram nuam a nih avangin, kan ram leilung leh kawngte hi, phaizawl ramte anga mel tam taka chhah innek bet tlat tur awm ve lo a ni. Chuvangin, lei a min awlsam a, kawngte pawh nghet taka nek bet tu awm ta lo chu; mihringte hmuh tham loh leh hisap thiam bakin, zawite tein a nghing che vel thin niin ka ring. Chuvangin, kan kawng siamte pawh an inman nghet thei lovin, an indelh muk thei thin lo a ni ang e. Geographicaly-in, Scientific thil tak a nih hmel te ka lo ti ve deuh thin. Kan kawng that theih loh avanga mahni inhnem nan, ‘ Kan ram hi kan awmna tura special taka Pathianin min pek a nih avangin, khawvel danglam hma chu kan kawngte hi tha tur a ni lova; chuvangin, a awm ang ang hian lungawi a ngai a nih hi. Kan danglamna entirna a nih hi’ ka ti then mai thin.
Nimahsela, kan leilung awm dan ang ang hian kan kawngte hi tun aia tha leh tlo zawka siam theih chu a ni. Motor chi hrang hrangin chhun zan zawma rahhrual reng atan chuan kan ram lung hi a no a ni tih hi tumah inhnial buai tawh lovin i pawm tlang vek ang u. Chumi avang tak chuan kan kawng siam dan hi thlak a ngai ta a ni. Mi rama an tih dan ka hre ve lo, mahse, a hriate sawidan- Cement concrete chhah tak chunga alkatra chhah tak an luan leh tih hi engvanga ti ve duh miah lo nge kan nih? A ram pumpui kan manganna, kan buai luih luih kumtluan kumtin na hi, a tihrehna awm reng si hi engatinge tih ve ena kan en ve duh miah loh chu le? Mizote tan tih ve theih loh, tih ve thiam loh leh tih ve phak loh kan ti zel em ni? Khawvelah hian tih theihloh tak tak hi a awm tawh loh hi maw. Nge, kawng chhia hian min la ti mangang tawk zo lo zawk?
Concrete chhah tak chunga alkatra chhah tak luan leh kher chu la ti thei nghal lo mah ila, cement concrete chhah tak hi chuan i siam zel phawt tawh teh ang u. Mizoram dung leh vang, chhak leh thlang hi kum khata thawh zawh ngei ngei tur bituk kumtin nei ila, kum 20 chhung chuan kan ram pumpui manganna hi chu kan tireh deuh duak ang. Chutiang tih theih ngei ngei tum, Flagship programe -a nei Party apiang chu thlantlin zawm char char mai tur a ni.
Tuna kan kawng siam dan, pawisa sen tlem tum lutuk avanga lung no tlemte phah den den a, chil muk that mangloh leh, chil muk vak ngamloh chunga PWD emaw, party contractor emaw-in, pan deuha alkatra an leih dum vel mai mai ang leh, khawi khawi emaw laia party worker ten pawisa hlep insem tam loh ringawt hlaua, lei hlang, sawh muk loh lehnghal chunga cement rim nam chang chang chauha dal deuh deuh an leih vel mai mai ang hi chuan; khawvel tawp hmain Mizoram hi a tawp mai ang tih pawh a hlauhawm a lawm maw le..
Contractor: National Highway hi NHIDCL kaltlang kher lo emaw, NHIDCL hnuaia thawk tur hian Vai firm kher lo, Mizoram sawrkarin emaw, Mizo contractor-in emaw a thawh ve theih em? A theih loh a nih pawhin, Sawrkar meuh leh Mizo mipui zawng zawng hian a theih dan tur zawngin theihtawpin i bei teh ang u. Tum tak takna a awm chuan a theih dan kawng a awm ang. Tun anga vai ho kuta innghah reng ringawt mai hi chu a hreawm zo zai ta em mai. Tlabung kawng mawlh mai te saw. An va khawngaihthlak rei tawh tak em.. An mangang aw rawl hriat pawh a hreawm ta hle mai. Vai ho lah chu tlawmngai tur leh thahnemngai tura hrilhin awmzia a nei der si lo. Kan ram tan thahnem an ngai der si lo. Engtin teh vak mah kan ti thei lo tih an hre kar mai si a. Vau leh velh lahin awmzia a nei bawk si lo. An hna kan ti thuanawp thui mai mai dawn si. Tlawn leh vau ti tih paha nawr reng pawha awmze nei chuang lo hi a ninawm ta. Mizoram chhunga NH hna te hi Mizote thawh theih ngei turin kan zavaiin theihtawpin i bei ang u. Nimahsela, Mizorama khawi kawng pawh siam turin, Mizo ni ringawt lo, Mizo number one, Mizo Kristian dik tak chauh ni rawh se.
Minister: Tuna PWD Minister hi mi tawng tlem, tawngkam thiam lo, mi dik leh mi tha, mi fair a ni tih hrechiangtute zing ami ka ni. Mahse, a mawhphurhna, a hna chanpual hi a lian lutukin, a rit lutuk niin ka hria. Hei hi amah ka sitna lam a ni lova, ZPM PWD Minister ka demna a ni hek lo. Ani ber kher phei hi chu, ka tan em em leh, a tihsual palh ka hlauh em em a ni. Nimahsela, hun rei tak, ZPM hun hma daih atanga ka ngaihtuah tawh thin, PWD pumpui hi Minister pakhat tan chuan a lian lutuka, a rit lutuk a ni. Mi State thenkhat pawhin an tih dan nia ka hriat, PWD hi Building leh Road-ah thenin, Minister hran ve vein enkawl sela, kan ram phei hi chuan kawng chauh enkawltu Minister kan neih hi a ngai lehzual a ni.
PWD: Hmanlai PWD kha an awm ta mang lo a, tunlai PWD-in an thlak chho mek a. Mahse, a lu lam, Officer ho hi an tam em em mai a. Tih tak takna, thahnemngaihna tak tak rilru pu a, ngaihtuahna leh tha leh zung seng tak tak hi chu an la tam chuang lo niin a lang. Kawng chungchangah ngat phei hi chuan, a atchilh tlattu Engineer kan neih a ngai a ni. PWD Piangthar lo pung sup sup teh u.
Engpawhnise, kan ram kawng chhiat chhan hi, special taka remote area-a Pathianin min dah vang tih pawm chungin- Sawrkar leh a changtu Minister leh Department leh mipui hian, kawng tha hi kan atchilh bur no. 1 a nih phawt chuan Pathianin kawng tha chu min la neihtir ve mai ang.