Liam Payne thisenah ruihhlo chi hrang hrang a awm

Liam Payne thisenah ruihhlo chi hrang hrang a awm
One Direction star Liam Payne thihnaah thu thar a awm belh zel a, toxicology report hmasa atanga a landanin a thih lai hian a thisen zungzamah ruihhlo chi hrang hrang hmuh a ni a, chung zingah recreational drug an tih ‘pink cocaine’ pawh a tel. Pink cocaine hi ketamine leh MDMA, methamphetamine, cocaine, opiod leh psychoactive substance te chawhpawlh a ni. Payne-a thlenna hotel room-ah hian aluminium pipe siam chawp an chhar tel bawk niin ABC News chuan a tarlang.
The New York Times pawhin Payne thisenah ruihhlo chi hrang hrang hmuh a nih thu an tarlang a, mahse, final result a la chhuak lo niin an tarlang bawk.
Noticitas Argentina news agency-in a tarlan danin Liam Payne thihna chhuitu zinga an hotu Marcelo Roma chuan preliminary toxicology result hi a puang a, Marcelo chuan he singer thisenah hian cocaine hmuh a ni a, tuin nge heng ruihhlo te hi lo pe tih an chhui tih a puang bawk.
Liam Payne thihnaa preliminary autopsy report-ah pawh Payne hian taksa chhung leh pawn lama hliam nasa tak a neih thu tarlan a ni a. Judicial Morgue chuan hliam 25 a nei tih puangin, a luruh, pum leh kut leh ke-ah te hliam a tam ber a, a hliam neih dan atanga enin hmun sang tak atanga tla a an thu tarlan a ni bawk. Hei bakah hian mahni invenna hnuhma ni thei awm a kutah hliam a awm lo niin an tarlang a, a taksa awmdan atangin a tlak lai hian nikhua a hre lo ni theia a lan thu an tarlang bawk.