A CLOSER WALK WITH ORGANIC FARMING – 42

RK Dawla
Mb 9366095658

1. October thla tâwp lam kan thleng a. Kumin ruahtui kan neih that avangin hnim pawh a thang chakin kawr leh lui tuihnâ pawh a la tha rei deuhin a hriat a. Kan environment, dimdawi taka enkawl kawngah pawh mipui kan harh thar zel niin a lang bawk. Ram te reuh tê, mihring pawh thâwl êm êm, sik leh sa nuam tak hnuaiah, state pachhe kumtiam kan ni reng mai hi mipuiten zah nachâng kan hre chho zel a. Kuthnathawh ngaihsan lamah kan ram a thangharh mêk hi chanchin lawmawm tak a ni. Sawrkarin kuthnathawktute a ngaihsak tak tak thar ta nia a lan avangin, Mizoram pawhin hma a sawn chak hle a beiseiawm a. Eng engemaw head phuahchawp a, mipui nawlpui hnenah, awmze neia an hman theih loh tur tih hriat reng reng, sum leh pai tawktarh leh sem hunlai kha a liam ta a. Khatiang system tawih lutuk kha chu kan ramah hian engtikah mah inlar leh tawh ngai suh se!
2. Kumin chu engtizia emaw ni, Serthlum chingtuten, pest chi khat, buaipui ang reng tak an nei thar tlat mai a. Chu chu lungphur phengphelep (moth) chi khat, zan lama ser rah puam dâwt thintu a ni. Hmun zo deuh leh phâi deuhah pawh a nghal kawp tlat mai a. Hetiang moth hian ser rah pang kha a dâwt hliam a, chutah chuan bacteria and fungi thenkhat rawn che nghalin, ser rah pang an titawih a, ser la hmin lo deuh, thang puitling tan kha a tla tawp tawp mai a ni. Hetiang harsatna hi favang laiin a awm ve fo nâ a, kumin ang êma hluar hi chu a awm ngai meuh lo. Moth-te hi êng bâwm thin an ni tlangpui a, chuvangin Light trap hmanga control harsa lutuk lo tur an ni âwm e. Khawvel lo danglam zelah hian farmer-te kan in-update vat vat a tul khawp mai, chuvangin lehkhathiam leh a ngaihna hria mihring kha, farming-ah an rawn luh char char a ngai a ni. thalai hawi zau leh dream mumal tak nei, system-in a kalkân thin sîte tân pawh tunah chuan hand holding hmangin kawng a inhawng tan ta a. Kan ram hmelhmang pawh a danglam har tawh lovang chu.
3. Research farmer ka ni a, ni tin zan tin farmer chi hrang hrangte nen interaction kan nei reng reng a. Tin, mahni phâk tâwkin kan hnaivaia resource hman remchan mai theih, thil chi hrang hrang buaipuiin research chi hrang hrang ka ti bawk thin a. Heng atânga ka ngaihtuah fo thin chu mihring chher kan ngai tih hi a ni. Eizawnna hrang hrangte ang bawkin, ram leh hnam tâna chhênfâkawm tak tak tur chuan, farmer kan neihsate hi, an nih ang anga rinrawla neih chi an ni lo. A pawimawh berah chuan an mindset kha a dik a ngai a, an hmathlir leh leh tumte tipuitling tak tak turin anmahni taka kha chher hriam hmasak an ngai a ni. Remhriatna nena remruatna tha zawk nei tur te, tun lai thiamna thar zel nena inherrem tur te, tlo leh daihrei tura ngaihtuahna sêng thiam tur chuan, farmer zawk kha develop hmasak a ngai a ni, a hmunhma leh facility aia hmasa-in. Tuna kan farmer tam ber hi chuan, duhthlan tur dang nei lova an inhriat avangin, an remhriat leh theihna ang angin, rem leh rem lovin, farming an kalpui a. Damdawi leh leitha chenin hman dan tur an thiam tâwk lova. Dik taka sawi chuan, an tharchhuahte pawh a quality loh phah a, pesticide residue a tam phah bawk ang tih hi ka chiang. Chuvang chuan, organic farming training institute mumal tak hi sawrkarin a ngaihven vat a ngai a ni, hnam hrisel nih kan duh chuan.