LPS Pro Fight-ah champion lai nen boxer 286 inlan dawn

LPS Pro Fight-ah champion lai nen boxer 286 inlan dawn
Thawhtanni khan Mizoram chhung leh pawn atangin Zudio LPS Pro Fight 2024-a tel tur boxer 280 an inbuk a, khaw dang atanga inbuk hman tura inngaite’n lirthei chhiat avanga harsatna an tawh avangin hriatthiam an ni a, technical lamin an tihchhian hnuah title chuh turin boxer 283 ziahluh an nih bakah champion lai pathum – Laldinsanga (bantam), Lalruatzela hauzel (welter) leh C. Lalhruaitluanga (middle)-te nen a vaiin boxer 286 an tel dawn a ni.
Mizoram pawn atangin mi pakua an tel a, Mizo hmeichhe boxer thate inlanna hun hawnsakin, December ni 6-ah Title Fight buatsaih a ni ang.
Weight hrang pangngaah Mizoram pawn atangin tel an awm vek a, middle-ah tam berin pathum an inlan dawn a, an vaiin state pawn boxer pakua ziahluh an ni a, Mizorama an kalna leh hawna man bakah an tel chhunga an mamawh phuhrukna’n cheng sangnga theuh pek an ni ang.
Tarlan tawh thin angin, November ni 1, Zirtawpni zanah LPS Arena, Falkland-ah tanin, November ni 23-ah weight hrang panga atangin round of 16 zawh vek a ni dawn a; November ni 25, 26, 27-ah quarter-final, November ni 29 leh 30-ah semi-final chhunzawmin, December ni 3-ah title chuh tur zawnna final a ni dawn a, hetah hian Mizo hmeichhe boxer thate tan hun siamsakin exhibition bout tum hnih a awm tel dawn a ni.
Fly champion lai NT Lalbiakkima a tel dawn lo a, welter-ah light champion lai HC Lalramfela a insawn bawk a; title humhim tur an awm loh avangin fly leh light-ah a hranpain title chuh tur zawnna final a awm dawn lo a, semi-final-a chak pahnihin champion nih an inchuh zui nghal dawn a ni.
Naktuk, Ninganiah LPS Office, Zarkawtah fixture tarchhuah a ni dawn a, weight hrang pali – fly, bantam, light leh welter-ah tawnhriat nei leh nei lo thenhran a ni a, seed nei boxer 28 an awm.
Fly-ah boxer 91-in title an chuh dawn a; Vanlalenkawltira (Champhai Dinthar), Lalrinngheta (Tuipui), Emmanuel Vanlalthlengliana (Melthum) nen mi pariat seed pek an ni.
Bantam-ah Dinsanga kawnghren kawl lai chhuhsak tumin boxer 67 an tel a; seed pariat pek zingah Omega Lalramdina (East Kulikawn), Sebastian VL Rinnunga (Ramthar Veng), Zohmingliana Sailo (North Vanlaiphai) an tel.
Ramfela kalsan light tlahlang chuh tura tel boxer 65 atangin mi pariat tho seed pek an ni a; C. Lalhruaitluanga (Cherhlun), Ramdinthara (Pangzawl), David Laldanmawia (Chanmari Lunglei) leh Vanlalringa (Serchhip)-te seeded zingah an awm.
Welter champion lai Ruatzela hmachhawn tumin boxer 37 an inziaklut a; bantam leh light-a champion tawh Ramfela (Chawngtlai) leh National Games-a silver medal hnekchhuak thei Lallawmawma (Tuipui) an langsar a; middle champion C. Lalhruaitluanga (Chawngtlai) hneh tuma inlan tur boxer 23 zingah nikum title fight-a chak zo ta lo F. Lalthanliana Jr. (Electric Veng Lunglei) leh 2019 champion C. Lalduhawma (Bethlehem Vengthlang) an tel bawk.

MIDDLEWEIGHT (KG 67-74) – 23
A hrana seed pek an awm lo a, C. Lalduhawma (Bethlehem Vengthlang, 2019 champion) leh F. Lalthanliana Junior (Electric Veng Lunglei, 2023 Title Fight)-te champion lai tum tur zawnna final-ah chauh an intawng thei dawn a ni.
State pawn boxer pathum – Martin Thangsiamlal (Lamka, Manipur), Kolos TKSin (Silchar, Assam), Thanggoulian (Madanrting, Shillong, Meghalaya)

WELTERWEIGHT (KG 61-67) – 37
Boxer pali seed pek an ni – HC Lalramfela (Chawngtlai, 2023 light champion, 2015 bantam champion), Lallawmawma (Tuipui, 2022 National Games silver medal, North East Olympics gold medal), Ruatfela Zote (Saithah) leh Zoremsanga (Venglui).
State pawn boxer pahnih – Manglianson (Lamka, Manipur), LK Mangboi Khongsai (Lamka, Manipur)

LIGHTWEIGHT (KG 56-61) – 65
Boxer pariat hnenah seed pek an ni a, chu’ng zingah chuan C. Lalhruaitluanga (Cherhlun, 2023 Title Fight) leh Ramdinthara (Pangzawl, 2023 Bantam Title Fight), Zonunzira (South Lungpher, North East Zone & State Level medalist), Vanlalringa (Serchhip, Pro Fight quarter-finalist, Pro Record – 2 win, 0 draw, 0 loss) an tel.
State pawn boxer pakhat – Mangnelson (Churachandpur, Manipur)

BANTAMWEIGHT (KG 52-56) – 67
Boxer pariat seed pek an ni – Omega Lalramdina (East Kulikawn, 2023 semi-finalist, Pro Record – 2 win, 0 draw, 0 loss), Gregor Joseph (2022 Flyweight semi-finalist), Sebastian VL Rinnunga (Ramthar Veng), Zohmingliana Sailo (North Vanlaiphai) an tel.
State pawn boxer pahnih – Mangkhanthang Guite (Lamka, Manipur), Thangbiakdik (Lamka, Manipur)

FLYWEIGHT (KG 48-52) – 91
Boxer pariat hnenah seed pek an ni – Vanlalenkawltira (Dinthar Champhai, 2023 Title Fight), Lalrinngheta (Tuipui, 2022 Bantam champion), Emmanuel Vanlalthlengliana (Melthum, 2023 semi-finalist), Lalzaenpuia (2023 Mizoram Fight Night champion) leh C. Lalchhanhima (Mamit) an tel.
State pawn boxer pakhat – Kaplianlam (Lamka, Manipur)