Tour de Hmuifang 2024
Tour de Hmuifang 2024
Mizoram Cycling Association (MiCA), Tourism Department leh North Eastern Council (NEC) tangkawpin an buatsaih Mizorama thirsakawr intlansiak ropui ber Tour de Hmuifang vawilina elite category-ah kumin National MTB Championship-a gold medalist K. Ronel Singh, Manipur a chak ber.
Kilometre 82-a hla Aizawl – Tuirial – Khumtung – Hmawngkawn – Chawilung – Lamchhip – Hmuifang lamtluang mountain bike hmanga intlansiak hi darkar 3:27:00 chhungin Meitei rider hian a tlan thleng a; pahnihna pawh Meitei bawk niin, Khariksing Adonis (Manipur) chuan darkar 3:27:06-ah a thleng.
Mesak Vanlalvena (Sihfa, Mizoram) chu pathumna niin darkar 3:41:21-ah a thleng.
Kumin Tour de Hmuifangah hian inelna category panga awmin, tourism minister Lalrinpuii chuan Aizawla Vana Pa Hall kawt atangin a vai liam a; ram changkang zawka an uar tak cycle khalh leh he mi hmanga inelna thianghlim chu Mizorama uar deuh deuh tha a tih thu Rinpuii hian a sawi.
Hmuifang Tourist Resort-a lawmman semna inkhawmah R. Lalrodingi, Director, Tourism Department chuan tha leh zung nasa tak senga inkhalh chhuak thin cyclist-te chu a zah tak meuh tih a sawi a, MiCA chu hruaitu tha tak tak an neih avanga an kal thui a beisei thu leh hun lo kal zel turah Tourism Department nen thawhho zel a duh thu a sawi.
Tour de Hmuifang 2024-ah hian cyclist 48 intlansiakin, Mizoram pawn atangin mi 13 an rawn tel a ni.
Elite category-a pakhatna Ronel Singh leh pahnihna Khariksing Adonis-te hi SAI hnuaia inzir mek, India ram aiawha vawi tam lo tel tawh leh national-a record nei tha tak an ni a; Ronel hi kum 2020 National XCO leh XCT-a silver leh bronze la phak, kumin National MTB-a gold latu leh NE Olympics 2022-a gold medalist kha a ni.
Masters competition
1. Peter Zohmingliana Bungkawn (2:28:36.59)
2. Lalduhkima Bawngkawn (2:28:36.99)
3. Nelson Hoover Bangalore (2:34:19.24)
Road bike competition
1. Laldintluanga Chanmari (1:53:30.76)
2. Lalremsanga Seling (1:55:02.06)
3. Dr. Dennis Malsawmtluanga Luangmual (2:08:42.66)
Women’s Competition
1. K. Malsawmkimi Chawnpui (3:36:46.86)
2. Lalrimawii Zuangtui (3:36:48.29)
Junior Competition
1. Thotmachan Awungshi Manipur (2:13:53.02)
2. Vanlalruata Tuirial (2:14:42.52)
3. Lalrinsanga & Mack Amazing Khyllait – –