Paris Masters-ah Alcaraz tlo lo!

French Open leh Wimbledon champion lai Carlos Alcaraz chuan Ningani khan Paris Masters round of 16 inkhel pakhatah tualchhung tlangval rinkai leh tantu ngah Ugo Humbert hneh loin quarter-final a thleng zo lo.
Nidanga a khelh thin dan pha tlat lo Alcaraz khan minute 26 lek chhungin world number 18 Frenchman lakah set khatna a hloh fel hman der a; set hnihna erawh harsa vak loin la zui ve bawk mah se set thumna hautak zetah a dingchang zo leh lo a, 6-1, 3-6, 7-5 hnehna nen Humbert zawkin last eight a lut.
Spanish world number two Alcaraz vawtlatu Ugo Humbert kha Frenchman zingah kum 2019 hnu lam Paris tournament-a top-five player hneh leh thei hmasaber niin, kum 2019 khan tuna a coach rawih mek Jeremy Chardy hian second round-ah Daniil Medvedev a hneh.
Grand Slam title pali la tling tawh Alcaraz hian final-a a tlawm hnu press conference-ah Ugo a lawmpui thu sawi chungin a khelh that loh chhan pakhatah court a mawhpuh a, nikum lawk nena khaikhinin ball kal chak zawng a danglam ta daih chu mak a tih thu a sawi.
Spaniard chuan, “Masters 1000 tournament zawng zawnga ball sawt a ran berna a ni a, tun dinhmunah tak phei chuan tour pumpuiah pawh court rang ber a ni hial ang. He tournament bikah pawh tunhnai kum 10 chhunga ball tleng nat ber tum a nih ngei hmel. Davis Cup indoor court-ah pawh ka khel a, kha kha he court ai pawh hian a la muang zawk.”
Ningani inkhel dangah third seed Alexander Zverev chuan 20th-ranked Frenchman Arthur Fils laka 6-4, 3-6, 6-3 hnehna changin player hraw zawk Stefanos Tsitsipas a tum leh ang.
10th-seeded Greek hian set khatna a hloh zet a, set hnuhnung pahnih erawh a tan a harsa ta lo a, 6-7(1), 6-4, 6-2-in Argentine Francisco Cerundolo a paltlang.
Ninth seed Alex de Minaur of Australia pawhin set khatna hloh zet chungin Britain player Jack Draper lakah 5-7, 6-2, 6-3 hnehna a sualchhuak ve bawk.
Last eight lut zingah Draper-a chipui Jordan Thompson pawh telin, Frenchman Adrian Mannarino lakah 7-5, 7-6(5) hnehna a chang.
Australian Alexei Popyrin erawh last 16 inkhel dangah Karen Khachanov chuan 7-6(5), 6-4-in a vaw tla.
Unseeded Russian Khachanov hian quarter-final inkhel pakhatah eighth seed Grigor Dimitrov a tum leh dawn a; last eight lut turin Bulgarian Dimitrov hian Frenchman Arthur Rinderknech lakah 6-2, 4-6 7-6(5) hnehna a chang hram a ni.
Holger Rune pawh hritlang khawsik avanga inhnukdawk world number one Jannik Sinner hmunruak luahtu French lucky loser Arthur Cazaux lakah a talbuai zet a, chiang angreng taka set hmasaber a hloh hnuah Danish 13th seed Rune hian 3-6, 6-3, 6-4 hnehna nen last 8 a lut.
Rune leh De Minaur an intum ang a, Thompson leh Humbert chuan semi-final luh an inchuh ve bawk ang.