Liverpool forward Jota chawl rih dawn

Liverpool forward Jota chawl rih dawn
Manager Arne Slot sawi danin Liverpool game hnuhnung pahnih khel thei tawh lo forward Diogo Jota chu November international break zawh thlengin a la chawl zui zel rih dawn.
October ni 20 inkhela 2-1-a Liverpool-in Chelsea an hneh tum khan Blues defender Tosin Adarabioyo nen an insutna lamah Portugal striker Jota hian a nakruh a tina a, khel zawm thei loa lakchhuah niin, a hliam kha rin aiin a lo na daih a, tun thlengin training pawh a la zawm thei lo a, Reds manager sawi danin tun thla November ni 11-19 chhunga international break lai pawhin a la inpeihchhuak dawn lo.
Kum 27 mi hian tunthla chhunga inelna hrang hrangah match li lai a la chawl dawn a, nizan Carabao Cup-a Brighton an hmachhawn tum pawh khan Conor Bradley chu training a zawmtir thu leh squad-a a sengluh mai theih thu a sawi a; Jota bakah Alisson, Harvey Elliott leh Federico Chiesa-te pawh Brighton game atan an la inpeih lo tih a tarlang tel.
Goalkeeper Alisson hi kaihza tha na avangin a chawl nual tawh a; kephah ruh khi avangin Elliott pawh a chawl a; kumin nipui thawt laia Juventus atanga an lakluh Chiesa pawh tun season-ah hian a club thar tan vawithum chiah a la khel.
Liverpool hian kartawp Inrinni zan Premier League-ah Brighton bawk hi Anfield-ah an mikhual leh dawn a; Champions League lamah Reds hian Bayer Leverkusen pawh an mikhual dawn a, international break hmaa an khelh tur zingah Aston Villa an tel bawk.
International break zawha Liverpool fixture hmasaber tur chu November ni 24-a kaithar Southampton an luhkhung tur hi a ni.