MPL 12 khel tur MLS

November 1, Zirtawpni khan Mizoram Premier League (MPL) 12 khel tur zawnna hmasa neih zawh a ni a. Lawngtlai club lian MLS (Medline, Larry, Sebastian) chu MPL 12 khel turin an tling. Kanan FC leh Chawnpui FC ten MPL hmunruak pakhat an inchuh zui ve leh ang.
Zirtawpni khan MPL qualifier khelh mekah vawi khat chak tawh MLS, Lawngtlai leh chak la nei lo Kanan FC an inhmachhawn a, inkhel hmuhnawm takah 2-1 in Kanan FC an chak. He inkhel hmuhnawm takah hian chak mamawh Kanan FC tan hian C Lalnunsanga chuan minute 30-naah hmahruaina goal a thun a. Minute 63-naah Lalthlanawma chuan an goal hnihna thunin, an hmahruaina a tizau.
Si hnih an phurh hnuin Lawngtlai team lianin na takin an khingpuite an nawr let a, goal pawh an thun thuai. MLS tan hian Rothangliana chuan minute 69-naah goal thunin an si phurh a sut then. MLS hian an si phurh sut zawh tumin tan an khawh nasa hle a. Kanan FC in an hmahruaina humhim chungin goal thun belh an tum viau bawk. Goal dang luh belh lohin inkhel hmuhnawm tak a tawp a, Kanan FC chuan MLS, Lawngtlai lakah 2-1 in hnehna an chang zui ta a ni.
MPL 12 khel tur zawnnaah team thum, MLS, Lawnglai, Kanan FC leh Ramhlun North FC te an inlan a, team pathumte hian vawi khat theuh hnehna an chang a, point thum an hmu vek. An inhnehkual vek vangin head to head a hman theih loh a, goal difference en a ni. MLS, Lawngtlai hian an khingpuite lakah goal thum thunin goal hnih an chhuah a, goal difference-ah +1 an nei. MLS hnehtu Kanan FC hian an khingpuite lakah goal thum an thun a, goal thum vek an chhuah ve bawk a, goal difference-ah 0 chiah a ni. Ramhlun North FC in an khingpuite lakah goal hnih an thun laiin goal thum an chhuah a, Goal difference-ah -1 a ni ve thung.
Point thum theuh an hmuh hnuin goal difference-a tha ber MLS, Lawngtlai chu MPL 12 khel turin an tling. MPL 11-ah khan Aizawl khaw pawn atangin SYS, Lunglei an tel a. MPL 12-ah SYS, Lunglei leh MLS, Lawngtlai an inlan dawn a, MPL boruak an vawrhin, MPL thawmin a nghawr zau leh zual dawn. MLS hnehtu Kakan FC in MPL 11-ah table hnuai ber dawttua awm Chawnpui FC chu MPL Play-off ah an hmachhawn zui leh dawn a. Aizawl West derby-a chak zawk zawkin MPL 12 an khel ang. Goal difference-ah Ramhlun North FC an chhiat ber vangin MPL 12-ah Ramhlun derby kan hmu thei dawn rih lo thung.
MPL hma lam hun
Mizoram Premier League (MPL) hi Mizoram tualchhunga football club te inelna lian leh hlu ber a ni a, ngaihhlut a hlawh viau thin. MPL atangin player tam takin hriat an hlawh a, ISL, I League leh state dang club a khel eng emawzat an awm tawh. MPL hi player tha zawk chher chhuaktu pawimawh leh tangkai tak a ni. Mipui pawhin kan hlut zual deuh deuh a pawimawh hle.
Boruak lian taka bul tan MPL hi a boruak a hniam chho hret hret a, final meuh pawhin a phu angin hlut a hlawh zo tawk tawh lo niin a hriat. Khawpui laili a khelmual; Lammualah khelh a nih tak loh vangin entu tan pan khawm a harsa ta a, chu vang chuan entu an tlem ta a ni mai thei. MPL a match tam zawk hi hnathawh ni (Weeks day) ah khelh a ni tlangpui a, buai a na thin bawk nen chu chu a boruak hniam zel chhan pawh a ni mai thei. Ni lo mai thei bawk.
Thei ila, tlin ila chuan chawlh kar tawp (weekend) ah, chutah pawh zanah zel khelh theih ni ta se chuan MPL hian entu ngahin a boruak a lian thei mai thei.
Thei ila, tlin ila chuan khawpui base in team siam ta ila, Aizawl khawpui hian team hnih lian tak, Aizawl derby pui tham tak tur nei thei ila. Team dangte hi District khawpui lian zualah inbun bawk se. Home leh away a khelh ni bawk se MPL boruak a lianin, inelna nung tha viau mai thei. Khawpui base hian ti thei ngat ila chuan MPL thawm hian a nghawr zau in, a huam zau lo thei dawn lo a, ring rawlh pawh an tam phah ngei dawn. A buaipuitu leh team inkhel tura zinkual a ngaih thin dawn vangin a hautak ngei ang. Chutiang chiah chuan khawpui hrang hrangah inkhel hmuhnawm tak tak en tur a awm fo dawn vangin hmuh let pawh a tam lo thei dawn lo. District khawpui hrang hrangin MPL club nei ta se, football boruak a nungin hmasawnna in a huamzau phah leh zual thei bawk.
Ngaihtuahna sen nawn fo a pawimawh khawp mai. Ngaihtuahna sen nawn kan tih nachhan hi MPL buatsaihtute hi football hmangaih tu tak tak an ni a. Football a hlawhtling tam tak pawh an awm. Football hmasawn nana mi thil phal leh inpe tak tak te an nih vangin ngaihtuahna lo seng tawhtu leh seng mekte an nih vang a ni.