Dam lo chung pawha bei hram hramtu Mizo tlangval haw thleng hnai

Thirsakawrin India ram state tin a tlawh a, UT panga a tlawh bawk. Hetiang hi thlawhna leh motor pawha thil peihawm loh a tling ang. Thirsakawra state tin tlawhtu hian mahni in a thleng hnai ta.
Tlang ramah te, phaizawlah te, khaw lum sa uap chuarah te, vur tlaknaah te thirsakawr a rap tauh tauh a, dam lo chung pawhin a bei hram hram. Chutianga a beih hram hram chung chuan, October ni 22 khan state a tlawh kim ta a, chumi hnua mahni khua panin a inrap leh ta a ni.
Vanlallawmzuala Varte, LZ-a tia koh hian January ni 25 khan a zin kawng hi a zawh tan a, boruak a thianghlim theih nana tanlak a tul thu aupuiin, ‘ride to clean air’ tih thupui kengin state hrang hrang hi a tlawh a ni.
Aizawl atanga a chhuah ni hian a dam lo nghal a, thla kua leh ni 11 vel a thang chhung hian vawi riat a dam lo hman.
Aizawl atang hian khawthlang lam kawng zawhin Tripura a pan a, Dapchhuah pelh, Dampui thlen hmain kawng sirah a riak. Hemi zan hian a khua a sik a, mahse a chawlh phah lo.
Ni khata a tlan thui ber tum, Lucknow leh Badlapur inkar, km 207 a tlan tum pawh khan dam lo chungin a tlan; a hma ni khan a nuam lo tawh a, a tukah khawsik chungin a tlan leh.
“Km 200 chuang han tlan theihna remchang kha, tlan loh atan chuan ka ui a, chuvang chuan ka tlan ta zel a,” LZ-a chuan a ti.
Thirsakawr khalhtute hian ni khata km 100 tlan hi ‘Gran Fondo’ an ti a, km 200 chu ‘Double Gran Fondo’ an ti. Km 100 tlan thei nih an chak a, km 200 tlan thei nih chu an chak lehzual ang. September ni 19-a Lucknow atanga Badlapur a pan dawn pawh khan, a hlat em avang te, a peihawm loh em avang te khan LZ-a kha a phur zawk ang a, dam lo chunga khatianga thui tlan thlen tum kha ‘chona’ a tling ang. Chu chona chu a hmachhawn a, a hneh. Mahse a zanah a tlun! A tukah pawh a tlan leh a, zan hnih a khua a sik leh.
Khaw lum vanglaiin a tlan nasa a, a chang chuan degree Celsius 50 chuangah te a tlan. A changin vur tlakna hmunah te a tlan leh ang lawi a, Ladakh vela a tlan laiin vur a tla. Heng lai hian a hritlang nasa a, a hmui pawh a rep. A hmui hi a rep nasa a, a pan titih hial!
A kal ngai loh ramah mahni indap chawpin a kal a, kawng pawh a bo fo. “Vawi 20 vel chu ka bo ang,” a ti.
A thlen chin apiangin mipuiin an lo lawm a, mipui hmaah leh thuthar lakhawmtute hmaah boruak a thianghlim theih nana tanlak a tulzia sawina remchang pawh a hmu zel. Chu chu a zin chhan, a thupui a ni a, “Khatiang sawina hun ka nei thei kha hlawhtlinnaah ka ngai a, min lo hmutute’n an lo tangkaipui chuan a lawmawm ngawt ang,” a ti.
State tin a tlawh hnuah October ni 31 khan Mizoram a lut a, tlai lamah Vairengte a thleng. Vairengte atanga Aizawl a pan kawngah mipuiin an lo lawm thei hle. Selesih-a a riah hnuah Thawhlehni hian Aizawl tlan thlen a tum a ni.