Point 9 in Barca an fal

Pathianni zan khan Spanish La Liga 2024-25 khelh chhunzawm a ni a, hmahruaitu FC Barcelona chuan an mikhual Espanyol chu 3-1 in an hneh. An mualah an chak leh tak vangin FC Barcelona hian table-ah point kua ngawtin hma an hruai fal. Pathianni zana inkhel dangah Atletico Madrid in hnehna an chang ve bawk.
Manager thar Hansi Flick hnuaia khel tha tak FC Barcelona hian an mikhual Espanyol lakah an khel tha viau a, minute 31 chhung lekin goal thum an thun hman. Chawlhlawk hnu lamah goal thun belh thei lovin, goal chhuah bawkah mah se an mualah hnehna an chang a, point thum hlu tak an hmu belh.
Barca tan hian RB Leipzig atanga kir leh Dani Olmo chuan minute 12-na lekah hmahruaina goal a thun. An mualah hma taka goal an thun vangin inrintawkna sang zawk nen an inlan a, goal pawh an thun belh leh thuai. Olmo goal thun atanga minute 11-na chiaha season thara chetha tak Raphinha chuan Catalan club lian tan goal a thun a, an hmahruaina a tizau. Si hnih faia hma an hruai hnuin goal hmahruai thuntu Dani Olmo chuan minute 31-naah Barca goal thumna a thun zui leh zat a, 3-0 ngawta hmahruai chungin chawlhlawk an hmang.
Chawlhlawk hnu lamah mualneitu FC Barcelona an khel tha chhunzawm viau. Hansi Flick team te hian goal thun belh ngei tumin tan khawh mah se an hlawhtling zo tawh lo. Season kal meka goal thun thei tak Robert Lewandoski chuan Espanyol lakah hian goal a thun thei lo tluan teh tlat. Barca in goal an thun belh theih loh lai hian mikhual team tan Javier Puado chuan minute 63-naah goal thunin an si phurh a sut then. An si phurh sut then bawk mah se goal dang an thun belh thei tawh lo va, hmahruaitu FC Barcelona lakah an tlawm zui ta a ni.
An mualah an chak leh tak vangin FC Barcelona hian khelh 12 atangin point 33 an hmu a, point kua zetin hma an hruai fal tawh. Barca hi an hnuai chiaha awm Real Madrid aiin vawi khatin an khel tlem zawk thung.
Hmahruaitu FC Barcelona an chak rual hian team lian Atletico Madrid pawhin an mualah hnehna an chang a, an mikhual Las Palmas chu si hnih faiin an hneh. Atletico Madrid tan hian Giuliano Simeoneleh Alexander Sørloth ten goal an thun a. Khel 12 atanga point 23 hmuin Atletico Madrid hian pathumna an luah.