Meitei firfiak chet rawva dan demna party pahnihin aupui

Meitei firfiak chet rawva dan
demna party pahnihin aupui
Tunhnaia Manipur Jiribam district-a Meitei firfiak pawlten Hmar nu pakhat rawng taka nghaisaa an that zui chu an demin, pawikhawihtute bawhzui ngei an duh thu an sawi.
MNF Gen. Hqrs. thuchhuak chuan, Meitei-ten Zohnahthlak khua an run duhtawk mai loin, he khua ami Zosangkim Hmar chu nasa taka nghaisa in rawng takin an hal hlum tih a sawi. Hetiang nunrawnna Zofa unaute chunga a thleng chu pawi a ti takzet tih a sawi a. Zosangkim Hmar kalsan tak a pasal leh a fate leh a chhungkhat lainate Pathianin awmpui se an duh tih a sawi.
‘Manipur-a Zohnathlak leh Meitei inkarah boruak tha a awm chhoh mek tawh lai a, hetiang thil rapthlak tak mai a thleng hi pawi kan ti takzet a. Meitei-te hian lungrual taka awm tlan a, remna neih an duh lohah MNF chuan a ngai a. Pawikhawihtuten an phu tawk hremna hmu ngei se kan duh a ni,’ a ti.
Zohnathlak chi peng hrang hrang, khawvel pum amite lungrual lehzuala hmalam pana kan kal a hun takzet tih thuchhuah hian sawiin, ‘Hnam anga beihna kan tawk na nasa chho tulh tulh hi lungrualna tha nena Zohnam zawng zawngten kan lo hmachhawn a ngai a. Chumi tur chuan unau kan nih hria a, lungrual taka ke pen za turin Zohnahthlak zawng zawngte kan sawm a. Zohnam puanzar hnuaiah ram leh hnam tan inhlan thar turin Zofa tawh phawt chu kan ngen a ni,’ a ti.
Congress Thalai Hqrs. pawhin thuchhuah siamin, Meitei firfiakten Zairawn khua runa in an hal bakah Zosangkimi Hmar nasa taka sawisa a, rawng taka pawngsuala an hal hlum zui chu rapthlak a tiin a dem takzet tih a sawi.
‘Meitei helhoin kan unaute chunga thla 18 chhung tharum an thawh hnuah MNF sawrkar khan engmah hmalakna a nei loa, MNF sawrkar nasa taka dem a, press conference hial neitu ZPM pawhin an sawrkar hnu ah engmah hmalakna an nei lo hi Zohnahthlak unaute ngaihsak duh lohnaah kan ngai a ni,’ a ti.
2023 November 2 khan khatih laia ZPM working president, tuna Home minister Pu K Sapdanga chuan thuthar thehdarhtute kawmin, Mizoramah ZPM sawrkar a din hnu pawha NEDA-in Zofa unaute an la sawisa chhunzawm zel a nih chuan, ralkhat atanga kut kuangkuaha thlir ngawt an tlin ve lo anga, a hen tawk tala unaute thlavang an hauh ve pawhin, an dem bik lo turah an ngai, tia a sawi thu Congress Thalai hian sawi chhawngin, Meiteiho sapatal avanga Zofa unaute tawrhna rapthlak tak chu a hmuna tlawh awm taka ngaih, la tlawh lo awmchhun chu Pu Modi leh Pu Zoramthanga deuh chauh an ni tawh awm e, tiin Pu K Sapdanga hian a sawi bakah Pathian leh mipui zarah ZPM a sawrkar chuan, Manipura Zofa unauten Mizoram sawrkar hotute hmel an hmu thuai ang, tia a sawi thu a sawichhawng bawk.
‘Kum khat dawn sawrkarna an chelh hnu hian, Manipur-a kan unaute tawrhna hmu turin amah Home minister Pu K. Sapdanga ngei pawh a la kal chuang bik lo hi mipui zah lohna leh a rintlak loh zia a tichiang a. Hetiang thil rapthlak tak thleng hi Congress Thalai chuan a enliam ve mai mai dawn loa, ZPM sawrkar hian Manipur BJP sawrkar a hmachhawn ngam lo a nih pawhin Congress Thalai chuan hma a la dawn tih ZPM sawrkarin lo hria se kan duh a ni,” a ti.
Thudawn danin kumin November 7 zan dar 9.00 vel khan Manipur Jiribam district-a Zairawn khuaah Meitei firfiak Arambai Tenggol chuan in 17 an hal a, khawmite an insaseng a, Zosangkim Hmar (31) w/o Ngurthansang Hmar chu a ke ah an kah fuh avangin a insaseng tha thei loa, an in bul hnim karah tawmin a pasal hian an fate hmun him lama a dah hnu ah va lam leh a tum chu Meitei firfiakte hian an lo hmu hmasa in nasa takin an sawisa a, an hal hlum zui a ni. Zosangkim hian a fate – Franky Lalchawisang (3) Victoria Laldomawi (9), Lalringdik (7) a kalsan a ni.