Aizawlah heroin kg.3 chuang man
Aizawlah heroin kg.3 chuang man
Ni hnih chhungin Aizawlah heroin kg.3 chuang man a ni a, Champhaiah two wheeler taxi hnuaia thuhruk heroin man a ni bawk.
Excise & Narcotics Department leh Zemabawk East Joint Action Committee (JAC) thawk dun chuan November 9 zing dar 3.30 khan Zemabawk East Kanan Thar Vengah heroin kg.2 & gram 557 (hawng 220) an man a, a neitu nia puh mi pahnih – Thangmuansein (30) leh Thangkhansawm (22) Tuithang, Tiddim Myanmar-a khawsa ve ve nia inchhal chu an man.
Excise & Narcotics leh Zemabawk East JAC tho hian hemi ni zing dar 6.30 ah khan Zemabawk East, Kanan Thar Vengah bawk hian heroin kg.1 & gram 177 (hawng 94) an man leh a; a neitu nia sawi Sowab Uddin (23) Patharkandi Karimganj district Assam-a khawsa nia inchhal an man bawk.
Heroin an man hi a vaiin kg.3 & gram 734 (hawng 314) a ni.
November 8 khan Excise & Narcotics leh Assam Rifles tangdun chuan Champhai Zote-ah heroin gram 129.35 an man a. Hemi kaihhnawihah hian Zolawmsanga (24), Myanmar chu man a ni a, a two wheeler khalh lai ke dahna hnuaiah a thukru a ni.
Heroin vanga mante hi ND&PS Act 1985 tlawhchhanin thubuai siamsak an ni.