Tuirial Hydel Project neih dan ang chi din kan remti tawh lo – Power minister

Tuirial Hydel Project neih dan
ang chi din kan remti tawh lo
– Power minister
Tuirial Hydel Project din dan ang chi, state sawrkarin ram zau tak pea compensation atan cheng vaibelchhe za tam a sen hnua man to em ema power a siamchhuah lei let ngai ang chi Mizoram sawrkarin din a remti tawh lo tih Power minister F Rodingliana chuan sawrkar laipui hotute hriatah a sawi.
Union Power minister Manohar Lal kaihhruaiin Thawhlehni khan New Delhi-ah state leh union territory-a Power minister ho intawhkhawm neih a ni a, minister F Rodingliana pawh hi telin, central PSU – NEEPCO-in Tuirial Hydel Project a neih dan ang chi leh state a insen teuh hnua hamthatna hmuh let tur awm mang lo ang chu din an remti tawh lo tih a sawi a. Megawatt 3500 thar theihna Mizoramin a neihah state-in hlawkna tam zawk a neih ve na tur a nih chuan company rawn lut turte an lo lawm em em tih a sawi a ni.
NEEPCO-in eng chhit loh man, shortfall energy bill cheng vaibelchhe 102 a thin thu pawh sawiin, hetiang harsatna hi a thlen tawh lohna’n Ministry of Power leh Central Electricity Authority of India thuneitute chu hma la turin a ngen tih a sawi bawk.
North East State Power minister ho thutkhawma a lo thlen tawh, MNRE scheme ‘Development of Small Hydel Project’ kum 2014-a tihtawp tak chu NE state-ten an hlawkpui tawh thin a, NE Power minister zawng zawngin he policy hi tih nun leh an duh a, an nghakhlelh tih F Rodingliana hian sawiin, Union Power minister hmasa RK Singh-a’n cabinet approval chauh nghah a nih tawh thu a sawi chu chak zawka bawhzui sak turin a ngen tih a sawi a ni.
Mizoram sawrkarin central-a project a thehluh chu a tlangpuiin state dang aiin project cost a sang bik nia an lo sawi thin chu Power minister hian sawifiahin, state dang nena khaikhin theih a ni loa, India ram hmarchhak kilkhawr, tlangram chhengchhe taka awm kan nih avangin, kawng a kualin bungraw chawkluh man a to bik em em a, kumkhatah fur ruahtui tlak tam lai ni 100 chuang a nih avangin company tam zawk an rawn kal tha duh lo tih a sawi. Mizoramin ruahtui a dawn tam hi power lam atan chuan malsawmna a nih thung avangin hydel project tam zawk siam tura Mizoram sawrkar inbuatsaihna theihtawp chhuahpui turin sawrkar laipui a ngen tih a sawi bawk.
Intawhkhawma sawiho zingah Mizoramah pawh kalpui tura hma lak mek – Pump Storage Project Battery Energy Storage System (BESS), Electric Vehicle Charging Station buatsaih chungchang, PM Surya Ghar Rooftop Solar hmalakna kal mek, Smart Metering Project bakah Solar Park tam zawk din chungchang a tel a ni.