RK Dawla
Mb 9366095658
-- Advertisement --
1. November thla laihawl a ni a, thlasik rim a nam fel tawh hle. Zan rei lamah dài a far tluk tluk tawh a, zing lamah lui dung leh kawr ruam thûk deuh chu tiauchhûmin a khuh var leh ta chûk a. Zan lam nise boruak thiang tak kârah thla leh arsi a lang fiah êm êm a, Siamtu kutchhuak ropui tak tem tura Pathianin kan nunna a la zuah hi a va lawmawm êm! Hna thawk thei, ei leh in theia kan awm ringawt pawh hi Van malsawmna hlu lutuk tak mai a ni. Mihring siamchawp thil ropuite ai chuan Pathian siamsa, nature mawina hian rilru leh thlarau a tidam sawng sawng thin.
2. Huan kumhlun neite chuan hnim sàmna hun tha tiin uluk takin huan kan säm mek ang a. Hetih laia kan hriat tlat tur thil tam tak a awm thung. Hnim no tawih hian bacteria a tipung a; hnim chang tawih erawh chuan fungi a tipung thung. Thla thum thlai leh kumkhat thlaite hian bacteria an mamawh tam a, chuvangin hnim no thlawh/säm kha a hlu thin a. Thlai kumhlun, hrâm tawh deuh erawh chuan, leilunga fungi tam kha an mamawh thung a. Hei vang hian hnim chang säm tura huan hnim zuah chan kan mamawh thung. Hnim chang ruang chu, thil fei/hruihram a tam a, chu chu fungi lam tân chaw tha a ni a. Chuvangin, taima taka thlai kumhlun huan hnim säm chhên mai kha, thlaite duatna ni lovin, tum loh deuhva thlaite hremna zawk a nih chu. Kan thlaite, an mamawh ang environment kan siamsak thiam kha natna leh rannung laka an him nân te, an rah chhuah hlâwk theih zawk nân te, tha leh sum tlem zawk kan sên theih nân bâkah kan thlai leh leilung a lo tlo zawk theih nân a pawimawh êm êm a ni.
3. Hmun tam takah buh kan seng zo fel mêk a. Buhpawl leh fafu hman tangkai theihna hmunah chuan, thlai bul khuh (mulching) atân a tangkai êm êm. Thlasik thlai bul khuh nân mai ni lo, thlai kumhlun bul khuh nân leh lei chhe hnim bit siamthat ngai khuh nân a tangkai êm êm. Lei chhiaah chuan, hnim a bit a, inchen thêm thêmin hnim an chawr a. Khalai lei tho kha a lo that telh telh rual khan, hnim a thawlin a insanhleih telh telh thin. Hneh taka buhpawl leh thildang ilo hmanga leilung khuh hian, kan khuhna kha lo tawihral mah sela, khalai leilunga hnim to kha a thâwl kumtluan tawh thin, tuihâwk leh nisa vanga lei a kalral da hle a nih loh chuan. Farmer-te hian kan thlai chinte dinhmun kha kan ngaihven ber tlangpui thin a. Mahsela, leilung zawk kha a bulthut, engkima pawimawh hmasa a ni tih hriatna kawngah kan harh chhoh thuai a tul hle. Lei a dik loh chuan, vai leitha leh bawlhlo tha tak tak pawh hmang ila, thil a fel chiangkuang mawh êm êm. Mizoram hmun tam zawk phei chu, awih pang, ruah a sur hlek tawh chuan kum 20/30 lei chunglâng inchhekkhawm tawh kha, zankhat thil thua a bo duak theihna a ni a. Hei vang hian, phaizâwla hmunhma neite aiin awihpanga hmunhma enkawltute hian, ngaihtuahna leh tha leh zungah kan hah chuangliam hlek a ngai, hei hi kan pawm phawt tur a ni. Tun ang thlasik tantir atân phei chuan, kan huan leilung kha nisa-in direct-a a chhun loh kha a tha ber a. Duhthusamah chuan, hnim hringin a khuh reng theih nân a mual muala tuipêk kha a pawimawh a. Hei hi kan thei lo a nih pawhin, hnim ruang ro, parcel chhia, kuhva khehna kawro ro etc, engemaw tala leilung kha nisa laka venhim a pawimawh thin e. |hal a lo nih tawh chuan, kan thlai leh leilungte mamawh ber No 1 chu hnâwng – vawnhim, pêkbelh leh tihpun kha a ni e.