David Zochhuanmawia
(Vida Hrahsel Saza)
-- Advertisement --
Aizawl khawchhung kawngpui thang si lo, pun belh bawk si lo hi engtia tih chi nge ni? Motor erawh a ni têlin chi tam tak a chhuak thar a, a pun belh thur thur a. Lirthei zuartuten an lirthei zawrh an hralh (sales) hnemzia kan chhiar fo a. Kum 2044 ah chuan Aizawl khawpui chhung dinhmun hi a ropui lo ngawt ang. Kan insak dan te, mimal ram (ti ila a tul phawt chuan sorkar ram vek chu a ni tho a) neih danah te hian remruatna fel (master plan) a tir atanga mumal taka kan lo nei lo hi kan tuar zel dawn niin a lang.
Hmasawnna –
Mizoram hian nasa takin hma a sawn a. Tute emaw tawngkam thiam satliahin tu sorkar lai mahin hmasawnna a awm lo an ti hi chu thu belhchian dawl lo ‘DAWT’ a ni phawt mai. Zirna (Education) chungchangah te, hriselna leh Damdawi In (Health & Hospital) ah te, êng (Power) chungchangah leh tui (PHED) lamah pawh nasa takin Mizoramin hma kan sawn a. Kawngpui tam tak laih tlang niin kuthnathawktute tan feh kawng (link road) tha tak tak laih a ni bawk a. A hre duh leh a hmu duh tan chuan hmasawnna hi hun kal tawhah khan a tam hle a ni.
Hun a liam tawh, mahse…
Hun liam tawh kohkir theih tawh si loh koh eih a fuh lohzia leh uar taka sawia dem tûr zawn ngawt aiin kan hma lam hunah tun dinhmun pawimawhzia hriain engtin nge kan hma lam hun atan Aizawl khawpui tan hian ruahmanna fel (master plan) kan neih ang tih hi ngaihtuah a ngai. Tun atanga kan tu leh fa lo la awm zel tùrte tan hian kan la tlai lo. Kan ram hruaitute hian thil hi a harsatna chauh zawng dawn se tih theih tak tak a awm lovang. Mahse, a theih dan tûr zawn tlat chuan thil theih loh tùra ngaih kawng chhawng te pawh a awhawm ta ngawt mai!
Heti zâwng hian thlir chhin ang-
Civil Hospital, Aizawl chauh nei reng thin khan tunah chuan sorkar Damdawi In changtlung tak Referral Hospital, Falkawnah kan nei tawh a, a panna kawng hla deuh mah se sorkarin hun bi (timing) neiin Bus a service tir a, sum leh pai nei ngah lo tan pawh awlsam taka veivah theih a ni. Tin, sorkar damdawi In a nih angin awm man, inenkawlna senso a tlawm a, Aizawl khawpui laili leh hmun chêp tak Civil Hospital-a inhnawhkhawm ngai tawh lova sorkar hmasa te’n ruahmanna an lo siam hi a fuh thlawt a ni. A fuh êm êm nachhan pawimawh tak pakhat chu Aizawl khawpui a ti thawl hi a ni.
Tin, Aizawl khawpui laili takah sorkar pisa lian tak tak a ding a, mipui tan dawr awlsam zawk chu a ni teh meuh mai; mahse, khawpui chhunga lirthei veivah ngaihna a awm dawn loh bakah a dahna (parking) kan inchan dawn hauh lova. Khawpui zauhna ni pah zelin hmun remchang tak New Secretariat din a lo ni leh zelte hi a va tha tak êm! Tun dinhmunah phei chuan a panna a hla lo bawk nen lirthei dahna (parking) mumal tak awmna hnuaiah kan sorkar thuneitu liante pawh kan dawr zung zung thei ta. Sorkar hmun pawimawh mi tin ban phak ni si, man tlawm zawka pan anih theih nan Line bus emaw, Auto Rickshaw (Bungkawn to Secretariat) emaw a tul dan angin sorkarin tlan tir zel se a tha ngawt ang.
Engtin nge Master Plan thar chu –
Sorkar thuneitute hian theihtawp chhuahin hma han la sela, mipui pawhin kan theihna zawn zawnah thlâwp tlat bawk ila a tha viau ang. Hmun pawimawh khawpui ti tawt thei tam tak hi khaw daifêmah sawn dan zawn nise; tin, Aizawl khawpui kan zauh a ni zel bawk ang. Khawchhung traffic jam pawh tlemin a ziaawm thei ang a, a ziaawm lo a nih vêk pawhin a tlanna hmun kan tih zauh a, khawpui kan zauh phawt chuan kan lirthei tlan dan hian ziaawm lam a pan chho zel thei dawn bawk a ni. Sawi belh tùr tam tak a awm thei ang; ngaihtuah chhunzawm ila…
Krismas dawna kea inkal pelh ngaihna awm lo khawpa tawt thin kan Bazar-pui te pawh hi hmun khat chauh ni lovin, hmun dangah tuna kan neihsa ang tluk hi hmun thum, hmun li laiah neih belh thei ila, a thar ho reng reng chu ram awl hmun hla zawk hretah a panna kawngpui tha tak nise, tin, sorkarin mi harsa zawkte tana pan a awlsamna turin Public Transport (Bus, Auto Rickshaw, etc.) man tlawm zawka chuan theihna tur Service tir bawk se, mipui kan punkhawm luih luih thinna hmun lian tam tak hi khawpui zauh zelna atan (tun atan chuan khawpui daifêm a ni rih ang) sawn chhuak hret hret zel ila, hma kan sawn a ni zel bawk ang a, khawpui tawt lutuk hi tlêm tlêmin a ziaawm chho zel thei ang.
Inremsiamna hmanga mimal In dinglai neih sak –
Aizawl khawpui hi a tir atanga ruahmanna fel (master plan) mumal tak chu awm nise hruaitu kal hmasaten kan kawngpui hi a zau thei ang bera dah an duh ngeiin a rinawm. Mahse, an hun lai khan hun harsa tam tak pawh an tawng ve thovin a rinawm a. Engpawhnise, sawi leh sawi hnu tun dinhmun hi kan ngaihtuah a, kan tu leh fate tual chaina tùr hmun thawl leh nuam kan siamsak hi a tul hle a ni. Tuna puitling than kin tawh kum 55 chin phei chuan chhawr pha dawn miah lo mah se, chhungkua leh sorkar inremsiamna (compensation) hmanga kawngpui zauh theihna tura an in leh lo hman sak dan zawn a nih theih nan sorkarin sum leh pai tam tham tak Central-ah ngaihtuah sela, vawi leh khata tih burh chi ni lo mah se, khawpui chhung tawt zual lai atanga bultana hma kan lak chhoh bek bek chuan tun atanga kum 20-ah chuan hmasawnna nasa tak kan hmu tawh ngei ang.
Tin, Assam Rifles an chhuak dawn, an chhuak dawn lo kan tih fo te hi an la chhuak dawn mai rih lo a nih pawhin ruahhmanna fel tak siampuiin Aizawl khawpui lûn zualpui phei chin zawnga an ram (kawngpui atanga an ram chin lamah) feet 8 vel kan kawngpui zauhna atan lak/neih min phalsak turin ti ila, khawl tha tak tak hmangin han laiin han ti zau ila thla khat hnathawh pawh a ngaiin a rinawm loh. A hmun a remchang phei em em vek bawk a. Tin, chutiang bawkin Bungkawn hnaih Assam Rifles te pawh an ram tlêm lak dilin Bungkawn atanga Secretariat panthlakna pawh thawl nuam takin a awm thei ngei ang.
A tlipna –
Mithiam zawkte leh a ngaihna hre zawk te’n ruahmanna tha leh felfai tak an nei thei ang tih ring chungin kan hma hun zela Aizawl khawpui tawt dan tùr suangtuahnaa a lo luh ve keuh keuh châng hian lung a hnûr thin a. Engtin tak emaw tih dan kawng zawn dan hi chu a awm ang maw le tiin engmah ni si lo leh thuneihna pakhatmah nei ve si lo hian mahni inchhunga lo inhrosak ve vak vak a awl thin hle mai. Naupang chhe ngaihtuahna tùr niawm taka ka’n thai lan thenkhat atanga ruahmanna fel tak siam theih a nih loh pawhin a aia tha zawk hi kan ram hruaituten ngaihtuah chhuak sela, kan ram tana kan vei thenkhatte aia veiawm zawk a ni em tih ngaihtuah chiang turin sorkar official-te leh tuna kan hrawn mek ZPM sorkar hotute hi kei tehlul hian ngenngawl takin ka ngen ni rawh se.