Nations League record siama chak Germany

Nations League record siama chak Germany
Inrinni zanah si sarih faian mikhual Bosnia-Herzegovina sawpin Germany chu kum ruka upa Nations League mipa match pakhata goal sarih thun tling thei hmasaber an ni.
Ti hian, Nations League Group A3 game nga an khelh tawh atangin German-ho hian goal 17 an tilut tling a; Inrinni match an khelh hma khan quarter-final lut tawh ni mah se kha hnehna avang khan group stage match khat khelh hmabak la nei chungin group winners an nih phah a, nakkum March thla khian stage sang zawkah group danga runners-up team an hmachhawn ang.
Europa-Park Stadion-a Inrinni zan inkhelah Tim Kleindienst leh Florian Wirtz-te’n mualneitu team tan goal hnih ve ve thawhin, goal khungtu dangte chu hmahruaina goal thawhtu Jamal Musiala bakah Arsenal forward Kai Havert leh substitute Leroy Sane-te an ni.
Freiburg khawpuia goal hmasaber hi minute hnih em pawh an khelh tlin hmaa Musiala tauhluh niin, Joshua Kimmich siamsak a ni a; Bayern Munich attacking midfielder hian club leh ram tan a zawnin game thum chhung goal a khung tling ta a ni.
Darkar chanve herchhuah hmain Tim Kleindienst chuan Robert Andrich-a pet a khaklut zui ve leh bawk.
First half-a goal lut hnuhnungber hi minute 37-ah Havertz-a thun niin, Florian Wirtz nena an one-two fuh lutuk hrinchhuah a ni.
Wirtz hian second half tir lam minute sarih lek chhungin goal hnih a thawh ve leh a; a hmasa zawk chu free-kick atanga a chhuihluh niin, Bosnia goalkeeper Nikola Vasilj ven zawh loh goal khat dang hnai set sawt atangin a khung zui leh bawk.
Minute 66-ah Sane chuan Havertz-a pass la fuhin a skill pui tak a lantir a, Germany goal rukna thunin, minute 80 khelh tlin dawnah striker Kleindienst chuan he match-a a goal hnihna leh home team goal hnuhnungber ni zui ta chu Antonio Rudiger-a cross atangin a thawh ve leh hram bawk.
Bosnia-Herzegovina tan inhamtan ngaihna a awm ta lo a, Nations League second tier lamah an tlathla zui ta a ni.
2026 World Cup thlen hma ngeia khawvel football ram ropui an nihna herlum leh tum ruh German-hoin point 13 neiin hma an hruai tlang dawn a; naktuk zan hian an group match hnuhnungber khelin Budapest khawpuiah Hungary an luhkhung ang.
Netherlands-in last eight lut ve leh
Inrinni zan inkhel dangah Netherlands pawhin 4-0 ngawta Hungary sawp chungin point riat nen Group A3 standing-ah pahnihna dinhmun an luah nghet a, nakkum Nations League quarter-final an lut chiang ta a ni.
Amsterdam khawpuia Johan Cruyff Arena inkhelah first half chhungin penalty vawihnih kan hmu a, goal hnih dang hi quality strike an tih ang, goal naran lo tak ve ve a bu bawk.
Penalty atanga mualneitu team goal hnih hi Wout Weghorst leh Cody Gakpo-te chhuihluh niin, second half-ah Denzel Dumfries chuan Netherlands goal thumna thawhin, squad-a kirleh hlim Teun Koopmeiners chuan goal khat a thawh ve bawk.
Bench lama Hungary assistant coach Adam Szalai a talbuai avangin Johan Cruyff Stadium inkhel hi minute sarih ngawt an chawl a; Szalai hi khelmual sirah tluin a ke a leng uaih uaih a, staff member-te leh substitute lamin an buaipui a; chu chuan hun a lak hek duai avangin hun pekbelh pawh minute 13 ngawt a tling.
A hnu deuha Hungary federation thuchhuah chuan kum 36-a upa Bundesliga striker hlui Szalai chu Amsterdam hospital-a enkawl a nih hnuah ngai a awh leh tawh tih an tarlang.