Box office-ah ‘Red One’ a No.1 US pawnah Gladiator II a che\ha
Box office-ah ‘Red One’ a No.1
US pawnah Gladiator II a chetha
Dwayne Johnson leh Chris Evans channa, Krismas lam hawi film thar ‘Red One’ chu North American box office-ah No.1 a ni a, Ridley Scott film siamthar ‘Gladiator II’ chu US pawn lamah a chetha ve thung.
Box office ranking hi weekend kalta (Zirtawpni – Pathianni) chhunga cinema hall ticket hralhna atanga tehin ranking siam thin a ni a, Hollywood Box Office bik hi North America-a cinema hall ticket hralhna atanga teh a ni.
Dwayne Johnson leh Chris Evans channa ‘Red One’ hi an chhut lawk dan aiin a chetha a, tun weekend kalta khan US-ah cinema hall ticket hralhna atangin dollar maktaduai 34.1 a la lut a, box office No.1 a ni. He film hi budget tam tham taka siam a ni nain, opening weekend-ah hian dollar maktaduai 30 pawh a lak luh theih an beisei meuh lo a, mahse, an chhut lawk dan aiin a chetha ta a ni.
US pawnah pawh Red One hian ram hrang hrang 75 atangin dollar maktaduai 14.7 a la lut leh a, US pawnah hian a weekend vawi hnih hmanna a ni tawh thung a, US pawnah hian kar hnih chhungin dollar maktaduai 50 la lut theiin, tihian a vaiin dollar maktaduai 84.1 a la lut tling ta a ni. Red One hi US-a an tlangzarh hmain ram dangah kar khatin an lo tlangzarh hmasa zawk a, hei hi Gladiator II nena innang lo tura an duh vang a ni awm e. Gladiator II hi US-ah an la tlangzarh ve lo a, mahse, ram rang hrang 63-ah tun weekend kalta khan an tlangzarh a, dollar maktaduai 87 a la lut thei tlat. A film siamtu Ridley Scott tan US pawn lamah a chet that ber tum a la ni.
Red One hi dollar maktaduai 250 senga siam a nia, an sum sen ngaihtuahin opening weekend-ah beisei a pha lo riau a, hei hi weekend kalta a Netflix lama Mike Tyson leh Jake Paul te inhnek en tur a awm vang a ni pakhat a, an rama Inrinni zan cinema hall ticket hralh a tibuai pha deuh tlat a ni.
Red One hi chhungkaw kima en ngam chi film a ni a, Santa Claus, a code name ‘Red One’ chu misualin an kidnap tlat mai a, North Pole security lama an hotu (Johnson) chu khawvela bounty hunter chhelar zet mai (Evans) pakhat nen thawk dunin, Krismas boruak hlimawm tak a awm theih nan Santa Claus chhanchhuak tura an chet dan vel tarlanna a ni.
Red One hi Jake Kasdan direct niin, Hiram Garcia thawnthu ziah behchhana chan a ni a, Lucy Liu, Kiernan Shipka, Bonnie Hunt, Kristofer Hivju, Nick Kroll, Wesley Kimmel leh J.K. Simmons te pawh an inlan.
Hollywood Box office top 10:
1 Red One $34,073,449
2 Venom: The Last Dance $7,355,000
3 The Best Christmas Pageant Ever $5,400,000
4 Heretic $5,167,153
5 The Wild Robot $4,300,000
6 Smile 2 $2,950,000
7 Conclave $2,850,000
8 Hello, Love, Again $2,370,000
9 A Real Pain $2,300,000
10 Anora $1,839,000