Zimbabwe president hovin MP-te thimah thu, rorel laiin power awm lo
Finance Minister Mthuli Ncube-a’n budget pharha thu a sawi tawp dawn lai mekin Zimbabwe parliament chuan power supply a nei lo thut a, ram hruaitu rualte thim hnuaiah hun eng emaw chen an thu.
An eng neih chu a phe zuk zuk a, a thum zui a, ram chhung mi pawimawh tak tak – President Emmerson Mnangagwa, Vice-President Constantino Chiwenga leh parliament member rualte chu thimah an thut a ngaih phah.
Zimbabwe-ah hian power supply chatlak hi an dan pangngai a ni a, ni khatah darkar 12 laite a awm lo thin a. Hei hi khawkheng nasa lutukin an power lakna ber, Kariba Dam-a tui a tikang vang a ni ber.
Eng a thim hnuah hian eptu MP-te au chhuakin an ram inrelbawlna fel lo lutuk vang a nih thu sawiin sorkar an dem. Zimbabwe Electricity Supply Authority (Zesa) thupuangtu, George Manyaya chuan power awm loh chu ruahman lawk leh hriat lawk a nih loh thu tual chhung chanchinbu, ZimLive hnenah a sawi.
Parliament hian a hranpain electricity supply a hmu a, hmun danga power a awm loh pawhin an thim ve ngai thin lo niin a sawi a. Tek tla avanga nei ta lo an ni tih a sawi bawk.
Eng a thim hma hian Ncube chuan khawkheng nasa avangin a budget pharhah chuan lo neih lama sum dah chu 15%-a tihpun a nih thu a sawi.
Kum tharah ruahtui tla thin pangngai aia tam an beisei avangin eibar thanna chu kum tharah 6% a ni dawn tih a sawi bawk a, hei hian electric an indaih loh pawh a tihziaawm tur thu a sawi bawk.
Zimbabwe president hovin MP-te thimah thu, rorel laiin power awm lo
Get real time updates directly on you device, subscribe now.
Prev Post