Reuben Lalnunthara Hnamte
-- Advertisement --
Tin, lal thu chu an hria a, an kal ta a; tin, ngai teh, khawchhak lama arsi an hmuh kha, naute awmna chung zâwn a thlena a din hma loh zawng an hmaah a kal zêl a. Tin, arsi chu an hmuhin an hlim nasa êm êm a. Tin, in chhûngah an va lût a, a nu Mari hnêna nautê chu an hmu a, an bawkkhup a, chibai an bûk a; tin, an ro bâwmte an hawng a, a hnênah chuan lawmna rangkachak te, beraw te, murra te an pe a. Matthaia 2:9
Bethlehem khua hi Israel rama khawlian vak a ni lova, khaw nuam tawk tak chu a ni ngeiin a rinawm a. Thutl;unghlui hunah pawh hian khaw lar vak a nih kan hre hran lova, Isua pianna a nih avang hian Christiante tan erawh khaw lar ber leh hmingthang a lo nit a. Pathianin he khua hi fapa Isua pianna atana a rawn thlan chat na chhan hi, khaw nuam leh engemaw tak chu amni ngeiina rinawm a, chu lam chu kan sawi tam lovang. Lal pian hun pangpar a lo vul leh tak avangin he tih hunlaia thil thleng ka hmuh te ka han sawi dawn a ni.
Arsi:
Bethlehema kan hmuh theih hmasak ber chu Arsi lian leh eng danglam tak chu a ni. Arsi hi mithiam ten an chhut dan chuan, boruak(Gas) leh thilnawi chhum ang mai a intelkhawm Nebula an tih mai atanga rawn insiam a ni an ti a. Nebula a boruak(gas) awm hi Hydrogen deuh vek a ni a. Tichuan boruak(gas) leh leinawi(dust) te inkarah inhiptawnna lo awmin a lo intel khawm a, muk takin a lo insiam ta a ni an ti. Arsi te hian vanglai hun leh damchhung an nei ve a, an thi ve thin an ti a ni. Sikeisen piah deuhah khian Arsi eng ber a sawi, Sirus or Dog Star an tih mai mithiam te’n an zir chiannaah chuan Ni aiin a let 26 in a eng zawk an ti a ni. Bethlehema Arsi kan hmuh pawh hi he Sirus kan tih hi a ni maithei. Pathian chuan chu Arsi engtak chu a fapa a piang tih hriattir nan leh mifingte kawng kawh hmuhtu a tan a hmang a ni. Arsi hi Pathianin a hman kherna chhan chu Jentailte leh khawvel mi ropui leh mithiamte hriattir nana a ni. Khawchhak miffing chauhlote pawh khan Arsi chu an hmu ngei ang, mahse, an ngaihsak lo, a hmun thleng turin an kal peih lova, a kalte pawh kawnglakah nawmchenna in a tibuai.
Van Angelte leh zaipawl:
Van zaipawl hi a hmain kan la hre ngai hauh lo. Thuthlunghlui hunah pawh Angelte chu an rawn inlar fo, mahse, van zaipawl ropui tak hi an neih kan la hre ngailo. He zaipawl thiam dan tur leh ropui dan tur hi mihring hriatna hian a chhut phak lovang. Pathian chungnungber fapa piang tur chu van mi te pawhin a lawmpui a, an hlutzia kan hmu thei. Israel mi tlawm takte, Berampute hnenah Angel te’n an hriattir a, kha tah pawh khan hriatirna dawng ve tho, zaipawl ropui tak pawh hmu a hre ve tho, Bethlehem thleng peih silo tam tak an awm ngei ang. Nausen Isua hnen thlenga thuawih taka kal te chuan, Pathian hriattir ang ngeiin engkim an hmu, lawmna leh hlimna ropui tak ten an kir leh a ni. Hriatitrna dawn ve tho, a hmun thleng duh silo te chuan heng lawmna hi an chang ve pha lo a ni.
Chibai bukna thilpek:
Mifingte chuan chu Lal thar chu thinlung leh tihtakzetin chibai an buk tih kan hmu. An thinlung mai nilovin, an neih rohluber thlengin Nausen chibai buk nan an pe a ni. Berampute’n thuawih takin Van angelte thusawi bawhzuiin Bethlehemah an kal a, Mari leh nausen an hmu a, chibai an buk a, lawm em em in an awmnaah an kir leh a ni. Nausen Isua chu engtin nge chibai I buk ve dawn? Lal Isuan heng mi te berte chunga in tih chu ka chung ti in ni a tih ang khan, Isua chibai buk nan leh I ro hluber te chu tu te tan nge I pek ve ang?
Tlawmna nun : Isua pianna hian a ken tel chu tlawmna nun hi a ni. A hmaah chuan Khawchhak lal pathumte chu tihtlawmin an awm, an lalna, an finna, an thiamna zawng zawngte chu Isua hmaah chuan an leih baw vek a ni. Heroda pawhin a ropuina nena chibai buk tumin hmalak a tum, mahse, phalsak a ni lo, chaponain hmun a chang lo. Mi chapo leh induh te tan Isua chibai a buk theih loh. Berampute chuan tlawmna nun nen Lalthar chibai an buk a, hlimna leh lawna nen an kir leh ta. Thei ve tawk, thiam tawk, hausa leh fel I in ti em? Isua tello chuan khang zawng zawng kha engmah lo mai a ni. Khawchak lal ropui pathumte pawh kha Isua hmaah chuan tih tlawmin an awm a sin.
Chanchin tha lawmawm:
Vantirhkoh te’n an rawn thlen chu chanchin lawmawm mi tin ta tur a ni. Chanchin tha lawmawm thlentu nih leh dawngtu nih hi ava nuam em! A puangtu an lawm a, a hretu te an lawmin an hlim bawk. Chu chanchin lawmawm chu I tan leh ka tan a ni. Van leh lei, Pathian leh mihring inremna chanchin lawmawm, midangte nena inremna chanchin lawmawm chu a ni. Thenawmte nena inremna, nupa inremna, khawtlang, chhungkua inremna chanchin lawmawm chu a ni.
Itsikna thinlung:
He Lal thar, kan tana lo piang hi Khawvel mi te chuan an pawm ve thei lo. Heroda chuan a pawm lo hul hual. A thinlungah leh khawvelah amahah, a ia lal an awm tur a nilo tih chu a pawm dan a ni bur mai. Keini pawh hian Isua Lal tir hi kan phal lo tihna em ni? Mahni aia thilti thei zawk, lar zawk, fel zawk leh hausa zawk te itsik na in kan khat, lawm te kan lawmpui thei lova; mahni nawmsakna ngaihtuahin Lalpa hi kan hawisan a ni.
Heroda hruai bova awm :
Heroda chuan amah aia ropui leh thiltithei a lo awm dawntih a hriat chuan a lawm lova, chu Lal thar chibai buk tura lokalte lo hruaikawi dan tur ngaihtuahin a hmanhlel a. Nawmchenna chi hrang hrang, Zu leh ruih theih thil, Sex leh nawmsip bawlna chitin reng a buatsaih a. Nausen chibai buk tura kalte chu a lo hruaikawi a, chu hmun thleng theilo turin, amah aia lal an awmlo tih hriattirin, nawmchen khurpuiah a lo hruai lut a. Chutah chuan Nula tlangval, nu leh pa tam tak chu an tang a, Nausen isua hnen thleng lovin Heroda-in ah an tawpa ni. Chu nawmchenna ah chuan thalai tamtakin an thianghlimna an hloh a, Zu leh ruihhlo ti ngailovin n ti thar a, Isua hnen reng an thleng thei ta lo. Hruaitu arsi chu an hloh a, a nghawng chu tah leh rumna a ni. Mizoram nula Tlangval, nu leh pa tam tak hi chuan Christmas in a tum hi a mual thelhin kan thelh a ni. Kuman thar ang a, nau ti tla leh HIV kai thar tam tak an pung ang. Nawmsip bawlna avanga a hun lova boral ta tam tak an awm bawk dawn a. Heroda hruai bova awm te chuan tah leh rumna nasa tak an hmachhawn dawn a ni. Bethlehem chu tah leh rumna ruamah an chan tir dawn a ni. Heroda in kal pelin nausen Isua chu chibai I buk dawn em?