University Games khel tur Mizo Karate player pahnih

University Games khel tur Mizo Karate player pahnih
December ni 1-5, 2024 chhung khan Chandigarh University-ah North-East Zone Inter University Karate (M/W) Championship 2024 nghah a ni a, he championship kaltlang hian Mizo Karate player pahnihin nakkum January thlaa Rotak, Punjab-a All India University Games an khel dawn.
Chandigarh khuaa championship hi University Games atana qualifying round niin, University zirlai atanga player chhuak an tam em avangin qualifying round hi buatsaih thin a ni a; North-East Zone atang hian category pakhat zelah mi 16 thlan an ni.
He championship (qualifying round)-a tel tur hian Mizoram University chuan All Mizoram Karate Association (AMKA) player pali leh official pakhat tirin, an zinga player pahnih K. Lalruatfela leh Joseph Lalrinzualate chu nakkum University Games khel turin an tling ta a ni.
Weight category tina round of 16 thleng phate hi University Games khel turin an qualify a; Ruatfela hi Govt. Hrangbana College-a B.A First Semester zirlai niin, -67kg huangah a khel a; an category-ah hian mi 82 awmin, ani hian quarter-final a thleng a, nakkum inelna lian hmachhawn turin a dinhmun a sawhnghet.
Rinzuala pawh hi Govt. Hrangbana College-a B.A First Semester zirlai tho niin, -75kg huangah a khel thung a; an category-ah hian mi 82 tho awmin, quarter-final bawk thlengin nakkum atan a qualify ve bawk a ni.
Mizoram University tirh Karate team hi AMKA general secretary Sensei Lalramthara (Tuikual South) chuan hruaiin, nimin khan Aizawl an lut a, All Mizoram Karate Association hruaitute’n an lo dawngsawng.
AMKA president R. Zomawia chuan University Games hmachhawn tura an naute pahnih an tling thei lawmawm a tih thu sawi chungin Mizoram University lamin sum leh pai tam tak senga an naute an buaipui avangin lawmthu a sawi.
Mizoram University aiawha All India University Games Karate Qualifying Round khela Mizo player fehchhuak dang pahnihte chu Govt. Champhai College-a B.A 1st Semester zirlai Vanlalchhandama leh Hrangbana College-a B.A 1st Semester zirlai F. Lallawmzualate an ni.
Chhandama hian Kumite -55kg leh Individual Kata a khel a; Lawmzuala hi Kumite -60kg huangah a inlan thung.
Mizoram Karate Team
fehchhuak
42nd BKI National Karate Championship 2024 khel turin Mizoram Karate Team chuan Ningani zan khan Karnataka an thleng.
Yadavashree Auditorium, Tenkila Puttur, Karnataka-a December ni 6-8, 2024 chhung awh tur National Karate championship-ah hian Mizoram State Sports Council(MSSC) bul tumin AMKA chuan player panga a tirchhuak a ni.
Mizoram tana karate player fehchhuak mekte hi Kolasib tuiliak ve ve Shihan John Lalchungnunga leh team coach Sensei Zoremmawia Hlondote’n hruaiin nimin atang khan an khel tan nghal a, chanchin buatsaih lai hian result tarlan hman a ni lo.
Mizoram team-ah hian Henry Vanlalrinawma chuan Junior -55kg huangah Kumite & Individual Kata a khel a; Isaak Lalpianhuna Hlondo chuan Sub-Junior 13yrs -30kg Kumite leh Individual Kata khelin, Ethan Lalngaihawma pawh Sub-Junior tho 8 yrs -30kg Kumite leh Individual Kata-ah a inlan.
Zoremmawia Hlondo chuan veteran kum 30 chunglamah Individual Kata inelna hmachhawnin, John Lalchungnunga pawhin veteran kum 50 chunglam inelna Individual Kata a khel ve bawk.
All Mizoram Karate Association president R. Zomawia chuan an player-te chu theihtawp chhuaha bei a, hlawhtlinna chang ngei turin duhsak a hlan..