Mizo Inchai Title Fight 2024

Mizo Inchai Title Fight 2024
Nilaini zan khan zan thum awh Mahindra XUV3XO Mizo Inchai Title Fight 2024 chu LPS Arena, Falkland-ah zawh fel niin, nulian leh palian champion laiin an title kawl lai an humhim ve ve.
A khar zana thu sawitu Mizoram Wrestling Association president Ngurthansanga chuan ruihhlo avanga Mizo thalaite buaina dolet turin sports association hrang hrang a sawm a; dan hnuaiah tha taka inhmachhawna hmasawn zel turin inchai chakte a fuih. Mizo Inchai buatsaihna’n sum hmuhna an nei lo a, cheng nuai riat vel sen ngai a nih laiin LPS Vision nen an thawhho theih avangin lawmthu a sawi nghal bawk.
He mi zan hian Diki Renthlei, Khawbel chuan ‘Teuh lo mai’ tih hla sain mipui pungkhawm a awi.
Mizo Inchai Title Fight (Palian)-ah champion lai Lalsangliana (E & ND, Upper Republic) chuan thawh 10 inchaiah 66-0-in Lalrinchhana Sailo (North Vanlaiphai) a hneh.
Kum 2014 atanga champion tawh Sangliana’n a kawnghren humhimin Rs. 1,00,000 a dawng a; Palian title chuha a inchai tawh vawi liah chak vekin tun hi a bitum a bawhbeh hmasak ber a ni.
Kg 97-a rit Chhana’n amah aia kg 24-a rit lakah point khat mah a thawk chhuak lo va, chuti chungin champion chotu a nih angin Rs. 50,000 hlan a ni.
Nulian title fight-ah pawh champion lai Lalhmangaihsangi (Dilkhan, Salem Veng) chuan a title humhimin Zodinpuii (Lunglei) a hneh.
Thawh nga an inchai chhungin 11-11-in an inhnehtawk a; thawh khat pek belhah point an hmu lo ve ve a, Inbanphawi hmangin a chak zawk chin fel a ni.
A vawikhatna’n Sangi’n Nulian title a humhim a, champion lai a nih vangin Rs. 50,000 hlan a ni.
Point paihsak tawk lo se thawh 5 an inchai chhunga chak thei Zodini’n title a hnaih hle a, Rs. 30,000 a dawng.