Kasparov-a record khuma champion Gukesh

Kasparov-a record khuma champion Gukesh
India rawlthar kum 18 mi ‘Gukesh D’ tia hriat lar Gukesh Dommaraju chuan tunkar Ningani khan history thar siamin world chess champion naupang ber a ni a, a hmaa he record kawltu chess legend Garry Kasparov-a record a chawkchhe ta a ni.
Singapore khawpuia World Chess Championship 2024 final-ah Gukesh hian game 14 harsa tak paltlangin reigning champion Ding Liren of China lakah 7.5-6.5 a score a, record thar siam chungin title a hlawhchhuak ta a ni.
Kasparov khan kum 22 mi niin kum 1985 daih tawh khan world champion naupang ber nihna a chang a, he record hi kum rei tak a din hnuah India rawltharin a rawn khum a, Indian chess star zinga he title la thei pahnihna niin, tum nga ngawt world champion ni tawh Viswanathan Anand-a hnung a zui ve ta a ni.