Mariah Carey ‘Christmas’ a Hot ber

Mariah Carey ‘Christmas’ a Hot ber
Mariah Carey Krismas lengzem hla ‘All I Want for Christmas Is You’ chu kar khat chu Billboard Hot 100 (singles) chart-ah a No.1 a, he chart-a kar 16 a No.1-na a ni a, Carey hla he chart-a kar 16 No.1 thei pahnihna niin, 1995-96 khan Boyz II Men te nena an zaihona ‘One Sweet Day’ chu kar 16 a lo No.1 tawh bawk.
‘One Sweet Day’ hi Hot 100 chart-a No.1 ni rei ber a ni ngar ngar a Lil Nas X featuring Billy Ray Cyrus ‘Old Town Road’-in 2019 khan kar 19 No.1 ni theiin a rawn lehpel a, kuminah Shaboozey ‘A Bar Song (Tipsy)’-in kar 19 No.1 ni theiin ‘Old Town Road’ record hi a rawn nih rual ve leh ta a ni.
‘All I Want for Christmas Is You’ hla hi 1994-a a tlangzarh tawh kha niin, Billboard Hot 100 chart top 10-ah a vawi khat nan December 2017 khan rawn langin, December 2018-ah top 5 a kai a, December 2019-ah kar thum chhung a No.1, 2020-ah kar hnih, 2021-ah kar thum, 2022-ah kar li leh 2023-ah kar hnih No.1 lehin, kuminah kar hnih a No.1 leh tawh bawk a ni.
Mariah Carey hian Hot 100 chart-a No.1 kai thei hla 19 a nei tling tawh a, soloist zingah chuan No.1 singles ngah ber niin, The Beatles (20) chiah a pha lo. Carey hi 1990s, 2000s, 2010s leh 2020s ah te he chart-a No.1 kai thei hla nei thei hmasa ber a ni bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni a, ‘All I Want for Christmas Is You’ hian kar khat chhungin stream maktaduai 47.7, radio airplay maktaduai 25.7 leh sales 6,000 nei lehin, a kar 16 nan chart-ah a No.1 pui leh ta a ni.
‘All I Want for Christmas Is You’ hi Krismas rimnam hlaah chuan he chart-a No.1 ni ngun ber niin, Hot 100 chart-a hian hetiang lam hla No.1 kai thei hi pathum chiah a la awm a, The Chipmunk x David Seville ‘The Chipmunk Song’ chu December 1958 khan kar li a No.1 thei a, Brenda Lee ‘Rockin’ Around the Christmas Tree’ chu nikum December khan kar thum a No.1 tawh bawk.
Carey hi hmeichhe zaithiam zingah he chart-a hla pakhat No.1 nih rei pui thei ber a nih bakah he chart-a a hla hrang hrang No.1 kai tawh te No.1 hun chhung belhkhawm chu kar 95 a tling tawh a, he chart-a zaithiam No.1 ni rei ber a ni bawk. Chart-a No.1 nih reiah hian Rihanna (60)-in a dawt a, The Beatles (59), Drake (56) leh Boyz II Men (50) te top 5-ah an lang.
Krismas a hnai tawh bawk a, Krismas lam hawi hla ngaithlatu an tam leh ta a, Hot 100 chart top 5-ah pawh Krismas rimnam hla hlang a awm a, 1958-a tlangzarh, chart No.1 pawh lo ni tawh Brenda Lee “Rockin’ Around the Christmas Tree’ chu No.2-ah bawk awm lehin, 1957 a tlangzarh tawh Bobby Helms ‘Jingle Bell Rock’ chuNo.5 atangin No.3-ah a insawn a, 1984 Wham! hla hit ‘Last Christmas’ chu No.3 atangin No.4-ah a tawlh a, 1964-a tlangzarh tawh Burl Ives ‘A Holly Jolly Christmas’ chu No.10 atangin No.5-ah a invawrh ve leh ta bawk.
Lady Gaga leh Bruno Mars ‘Die With a Smile’ chu No.9 atangin No.6 a kai thar leh a, Kendrick Lamar hla pathum top 10-ah langin SZA nena an zaidunna ‘Luther’ chu No.6 atangin No.7-ah a tawlh a, ‘TV Off’ featuring Lefty Gunplay chu No.4 atangin No.8-ah a tawlh a, chart No.1 hlui ‘Squabble Up’ chu No.7 atangin No.9 ah a tawlh ta bawk.
Chart top 10 khartu chu chart No.1 hlui, he chart-a kar 19 No.1 ni thei Shaboozey ‘A Bar Song (Tipsy)’ niin, No.8 atangin No.10-a a tawlh ve ta bawk.